Avstrııada kontsertke jınalǵandarǵa oq atyldy
ASTANA. QazAqparat - Avstrııanyń batysynda er adam kontsertke kelýshilerge oq jaýdyrdy. Atystan eki adam mert boldy. Bul týraly jergilikti «Kleine Zeitung» gazeti habarlap otyr.
Oqıǵa saldarynan taǵy 11 adam aýrýhanaǵa jetkizildi. Kontsert 22 mamyrǵa qaraǵan túni Forarlberg federaldyq jerindegi baıker klýbynyń aýmaǵynda ótken. Oq atqan adam oqıǵadan keıin ózine qol salyp kóz jumdy.
Oqıǵa jergilikti ýaqyt boıynsha saǵat 4-te bolǵan. Kontsertte barlyǵy 150-ge jýyq adam jınaldy.
Polıtsııanyń aqparatynsha, adamdarǵa oq atpastan buryn ol kólik turaǵynda áıelmen urysyp qalǵan. Alaıda, áıel atys kezinde zardap shekken joq.
