Avstrııada áıel 12 jasar balasyn ıttiń uıasyna qamap ustap, tamaq bermeı azaptaǵan

VENA. QazAqparat - Avstrııada 32 jastaǵy áıel 12 jasar ulyn qorlaǵany úshin tergelip jatyr. Ol balany ıttiń kishkentaı jáshigine qamap, kún sýyqta ash ustap otyrǵan, dep habarlaıdy QazAqparat BBC agenttigine silteme jasap.

Bul jaǵdaı birneshe kún buryn ǵana kópshilikke belgili boldy jáne elde narazylyq tolqynyn týǵyzdy.

Áıel ótken jyldyń qarasha aıynan beri Venanyń soltústik-batysyndaǵy Krems qalasynda qamaýda otyr.

Áleýmettik qyzmetker dabyl qaqqannan keıin ony polıtsııa ustaǵan.

Otbasynan bólek turatyn balanyń ákesi de polıtsııaǵa júgindi.

Bala tabylǵan kezde es-tússiz komada jatqan, dene temperatýrasy nebári - 26,8 gradýs, birneshe aı azap kórgen jetkinshek ólimniń az-aq aldynda bolǵan.

Bul jaıynda jýrnalısterge Tómengi Avstrııa provıntsııasynyń polıtsııa ókili Iohann Baýmshlager aıtyp berdi.

Bala shuǵyl túrde aýrýhanaǵa jetkizildi, al kelesi kúni anasy qamaýǵa alyndy.

Baýmshlagerdiń aıtýynsha, áıel kún saıyn balanyń ústinen birneshe ret salqyn sý quıyp otyrǵan, páterdiń terezelerin nólden tómen aýa temperatýrasynda birneshe saǵat boıy ashyp qoıǵan.

Ol balanyń fızıkalyq turǵyda qalpyna kelgenin, biraq psıhologııalyq jaǵdaıy nashar ekenin aıtty.

Mamyr aıynyń sońynda áıel Joǵarǵy sotqa shaǵymdanyp, birneshe aıdan beri sebepsiz qamaýda otyrǵanyn aıtqan, biraq sot onyń shaǵymyn qabyldamaı tastady.

Tergeý jazdyń sońyna deıin jalǵasady. Sodan keıin áıelge aıyp taǵylady.