Avstrııada 20-dan astam qarýly sheshen ustaldy
ASTANA. QazAqparat - Avstrııada polıtsııa Sheshenstannan shyqqan 20-dan astam adamdy ustap, qarýlaryn tárkiledi.
Arnaıy operatsııa juma kúni el astanasy Vena qalasy aýdandarynyń birinde ótken, dep habarlaıdy TASS APA agenttigi málimetterine silteme jasap.
Quqyq qorǵaý organdaryna jergilikti turǵyndardan Florıdsdorf aýdanynda birneshe adamnyń jınalyp jatqany jaıly habar túsken. Kúdiktiler bolsa, ánsheıin qydyryp júrgendikterin aıtqan. Al keıbiri úılený toıyn jeleý etken.
Polıtsııa jaqyn mańda qar ústinen tapansha jáne avtomat, sondaı-aq oq-dáriler tapqan. Oqıǵa ornyna shuǵyl lańkestikpen kúres boıynsha Vega arnaıy bólimshesi shaqyryldy.
« Barlyq 22 adam sol jerde ustaldy»,-dep atap ótti polıtsııadan. Qolǵa túskenderdiń avtomobılderine tintý júrgizildi. Tergeý jumystary bastaldy.
