Avstrııada 14 jasqa tolmaǵan qyzdarǵa mektepte oramal taǵýǵa tyıym salyndy
ASTANA. KAZINFORM – Avstrııada jańa oqý jylynan bastap 14 jasqa tolmaǵan qyzdarǵa memlekettik jáne jekemenshik mektepterde oramal taǵýǵa, bet-álpetti jaýyp turatyn kıim kııýge tyıym salyndy. Bul týraly Kazinform agenttigi VVS-ge silteme jasap habarlaıdy.
Úkimet bul zańdy «genderlik teńdik qaǵıdatyn qoldaıtyn naqty belgi» dep baǵalap, onyń qyzdardyń quqyǵyn qorǵaýǵa baǵyttalǵanyn málimdedi.
Alaıda synshylar jańa zańnyń Konstıtýtsııaǵa qaıshy kelýi múmkin ekenin alǵa tartady.
Jańa talaptyń oryndalýyn endi mektep muǵalimderi qadaǵalaıdy. Oqýshy qyzdyń oramal taqqanyn baıqaǵan jaǵdaıda, pedagog oǵan jáne onyń zańdy ókilderine túsindirý jumysyn júrgizýge tıis.
Quqyqbuzýshylyq qaıtalanǵan jaǵdaıda muǵalimder balalardy qorǵaý qyzmetine habarlaýǵa mindetti. Al talapty saqtamaý jalǵasa berse, eń sońǵy shara retinde oqýshynyń ata-anasyna nemese zańdy ókilderine 800 eýroǵa deıin (shamamen 930 AQSh dollary) aıyppul salynýy múmkin.
Eske sala keteıik, tamyz aıynyń sońynda Portýgalııada bet-álpetti jaýyp turatyn kıim kııýge tyıym salyndy.
Mundaı talaptar Frantsııa, Belgııa, Avstrııa, Danııa jáne basqa da birqatar elderde buǵan deıin engizilgen.
Aqzat Baqytjanqyzy
