Avstrııada 11 oqýshynyń ómirin qıǵan atqyshqa qatysty tyń derek jarııalandy

ASTANA. KAZINFORM — Eýropa jurtshylyǵyn eseńgiretken qaıǵyly oqıǵa Avstrııanyń Grats qalasynda boldy. Munda 21 jastaǵy turǵyn mektep oqýshylaryna oq jaýdyryp, 11 oqýshyny óltirip, taǵy 10 adamdy jaraqattady, dep habarlaıdy Kazinform tilshisi.

Jergilikti BAQ málimetinshe, atqysh bul shabýyldy muqııat josparlap, mekteptegi qandy oqıǵany ádeıi júzege asyrǵan. Keıin onyń úıinen qoshtasý haty men isten shyqqan qoldan jasalǵan bomba tabyldy.

Qoldan jasalǵan jarylǵysh qurylǵy jumys istemegenimen, tergeýshiler onyń quramynda barlyq qajetti komponent bolǵanyn aıtty. Sonymen qatar, tabylǵan jazbalarda kúdikti óz josparyn tolyq aıaqtaýǵa ýaqyty bolmaǵanyna ókinetinin bildirgen.

Tabylǵan zattardyń arasynda qoshtasý haty da boldy. Alaıda tergeýshilerdiń aıtýynsha, ol hatta qylmyskerdiń bul áreketke ne úshin barǵany týraly naqty málimet joq, negizinen otbasynan keshirim suraýǵa arnalǵan kórinedi.

Avstrııa tergeýshileri 21 jastaǵy jigittiń anasymen birge turǵanyn jáne tuıyq ómir saltyn ustanǵanyn anyqtady. Ol shynaıy ómirden oqshaýlanyp, onlaın álemde ómir súrgen jáne atys janryndaǵy kompıýterlik oıyndarǵa áýes bolǵan.

Úsh jyl buryn ol mektepti tastap ketken jáne oqýyn aıaqtamaǵan. Onyń buryn sottalǵany týraly málimet joq.

Shtırııa federaldy jeriniń polıtsııa bastyǵy Mıhael Loneggerdiń aıtýynsha, kúdikti mektepke seısenbi kúni tańǵy 9:43-te kirgen. Onyń arqasynda Glock 19 tapanshasy, qosaýyz myltyq jáne oq-dári salynǵan rıýkzak bolǵan.

Aldymen ol úshinshi qabattaǵy mektep dárethanasyna baryp, beldikke tapanshasyn ilip, arnaıy kózildirik pen qulaqqap kıgen. Sol kezde mektepte 400-ge jýyq oqýshy bolǵan. Qarý asynǵan qylmysker ekinshi qabatqa túsip, aınalasyndaǵylarǵa oq jaýdyrǵan. Saǵat 10:07-de ol qaıtadan úshinshi qabattaǵy dárethanaǵa baryp, sol jerde ózin-ózi atyp óltirgen.

Polıtsııanyń alǵashqy patrýli mektepke saǵat 10:06-da jetken. Oqıǵa ornyna quqyq qorǵaýshylar kelgende, atys aıaqtalyp, qaskóıdiń óli denesi tabylǵan.

Tergeýshilerdiń boljamynsha, 21 jastaǵy kúdikti mektepte atqan adamdarmen tanys bolmaǵan. Alaıda qaza tapqan muǵalim kezinde dál osy mektepte onyń ustazy bolǵan kórinedi.

Qazirgi ýaqytta tergeý jalǵasyp jatyr. Tergeýshiler kúdiktiniń noýtbýgi men USB qurylǵysyn saraptamadan ótkizedi.

Qylmyskerdiń bul áreketke ne úshin barǵany jóninde naqty derekter ázirge joq.

Buǵan deıin habarlanǵandaı, Avstrııa úsh kún aza tutady.