Avstrııa men Italııa arasyndaǵy temirjol tonneliniń qurylysyna jaýapty kompanııaǵa kıbershabýyl jasaldy

ASTANA. KAZINFORM – Avstrııa men Italııa arasyndaǵy Brenner bazalyq temirjol tonneliniń qurylysyna jaýapty BBT SE kompanııasy hakerlik shabýylǵa ushyrady, dep habarlaıdy DW.

d
Foto: DW

Bul týraly kompanııa ókili Tiroler Tageszeitung gazetine málimdedi.

Basylymnyń málimetinshe, kıbershabýyldyń artynda orys tildi Everest hakerlik toby turýy múmkin.

Everest halyqaralyq deńgeıde áreket etetin kıberbopsalaýshylar jelisi retinde belgili. Amerıkalyq ZeroFox kompanııasynyń taldaýyna sáıkes, bul top uıymdardyń derekterin urlap, olardy jarııalaımyz dep qorqytý arqyly aqsha talap etedi.

BBT SE kompanııasy kıbershabýyldy anyqtaǵannan keıin derekterdiń taralý kózine oqshaýlaý sharalaryn qoldanyp, tıisti memlekettik organdarǵa habarlaǵan.

– Kıbershabýyl anyqtalǵannan keıin kompanııa derekterdiń taralý kózin oqshaýlap, quzyrly organdarǵa habar berdi. Qazirgi málimet boıynsha, oqıǵa qurylys jumystaryna jáne jobanyń operatsııalyq protsesterine áser etken joq. Kompanııa kıbershabýyldyń mán-jaıyn egjeı-tegjeıli zerdeleýdi jalǵastyryp jatyr, – delingen aqparatta.

Kompanııa ókilderi hakerlermen kelissóz júrgizilgeni nemese olarǵa aqsha tólengeni týraly suraqtarǵa jaýap bermegen.

Brenner bazalyq tonneli Avstrııanyń Insbrýk qalasy men Italııanyń Ońtústik Tırol aımaǵyndaǵy Fortetstsa eldi mekeni arasynda salynyp jatyr.

Joba aıaqtalǵannan keıin bul tonnel Eýropadaǵy mańyzdy temirjol magıstraldarynyń birine aınalady dep josparlanǵan.

Aıta keteıik, buǵan deıin Germanııanyń Berlın qalasyndaǵy Charité ýnıversıtettik klınıkasyna hakerlik shabýyl jasalyp, qyzmetkerler men patsıentterdiń jeke derekteri urlanǵany habarlanǵan bolatyn. Kıbershabýylǵa qaramastan, medıtsınalyq mekeme jumysyn toqtatpaǵan.