Avstrııa WhatsApp-ty baqylaýǵa arnalǵan zań jobasyn daıyndap jatyr
ASTANA. KAZINFORM — Zań jobasy yqtımal lańkestik shabýyldardyń aldyn alý úshin habar almasý qoldanbalaryn baqylaýǵa múmkindik beredi, dep jazdy Anadoly.
Avstrııa WhatsApp jáne Telegram sııaqty habar almasý qoldanbalaryn baqylaıtyn zańjobasyn ázirledi.
Elde jyldar boıy talqylanyp kele jatqan qosymshalardy baqylaýǵa qatysty qujat parlamenttik shaǵyn komıtetke jiberildi.
Avstrııa Іshki ister mınıstri Gerhard Karner mınıstrler keńesi músheleri men úsh taraptyń laýazymdy tulǵalary qatysqan eki kúndik úkimet otyrysynda qaýipsizdik jáne ekonomıka syndy máselelerdiń talqylanǵan birinshi kúninde qabyldanǵan sheshimder týraly baspasózge aqparat berdi.
Mınıstr yqtımal lańkestik shabýyldyń nemese nysanǵa jasalǵan shabýyldyń aldyn alý úshin habar almasý qoldanbalaryn baqylaýǵa múmkindik beretin birinshi zań jobasynyń parlamenttik ishki komıtetke usynylǵanyna qanaǵattanǵanyn aıtty.
Іshki ister mınıstrliginiń basshysy terrorızmge, ulttyq qaýip-qaterlerge jáne tyńshylyqqa baılanysty jaǵdaılarda baqylaý sýdıanyń ruqsatymen jáne jeke derekterdi qorǵaýǵa jaýapty laýazymdy tulǵanyń qadaǵalaýymen júzege asyrylatynyn atap ótti. Bul jaǵdaı qarapaıym azamattarǵa áser etpeıdi, dep túsindirdi ol.
— Monıtorıng jappaı sıpatqa ıe bolmaıdy jáne jeke jaǵdaılarda ǵana qoldanylady, olardyń sany jylyna 25-30-dan aspaıdy, — dep sendirdi Karner.
Zań jobasyn parlamenttik kishi komıtet shamamen segiz apta boıy qaraıdy alaıda qujat tek jaz aılarynda júzege asýy múmkin, dep qosty ol.
Avstrııa bıligi, ásirese kúshtik qurylymdar habar almasý qosymshalaryna baqylaýdy engizýge kópten umtyldy. Alaıda ártúrli azamattyq qoǵam uıymdary bul usynysqa jeke derekter men azamattardyń bostandyǵyn qorǵaýdy shekteıdi degen ýájben qarsylyq bildirdi.
Eske sala keteıik, jaqynda Avstrııa Majarstan jáne Slovakııamen shekaradaǵy baqylaý-ótkizý beketterin japty.