Avstrııa kantsleri Sebastıan Kýrts qyzmetinen ketti

VENA. QazAqparat - Avstrııanyń federaldy kantsleri Sebastıan Kýrts 9 qazan kúni keshkisin otstavkaǵa ketetinin málim etti, dep habarlaıdy QazAqparat Deutsche Welle resýrsyna silteme jasap.

Ol mundaı sheshimdi elde alasapyran bolmas úshin jáne turaqtylyqty qamtamasyz etý úshin qabyldaǵanyn aıtty.

Sebastıan Kýrts úkimet basshysy qyzmetine qazirgi Eýropa jáne shetel isteri jónindegi mınıstr Aleksander Shallenbergti usyndy.

Degenmen, ol Avstrııa konservatıvti halyq partııasynyń kóshbasshysy bolyp qala beredi jáne onyń parlamenttegi fraktsııasyn basqarady.

Aıta keteıik, birneshe kún buryn parlamenttegi oppozıtsııalyq partııalar - Avstrııa sotsıal-demokratııa partııasy, lıberaldy «Jańa Avstrııa» jáne Avstrııa bostandyq partııalary Sebastıan Kýrtstyń qyzmetten ketýin talap etken bolatyn.

Jalpy, jýyrda Avstrııa prokýratýrasy kantslerge jáne taǵy 9 adamǵa qatysty tergeý júrgizip jatqanyn málimdegen edi. Olar artylǵan senimdi asyra paıdalandy jáne korrýptsııa jasady degen kúdikke ilingen.

Tergeý aqparatyna sensek, eldiń qarjy mınıstrligi 2016-2018 jyldar aralyǵynda bıýdjet aqshasyn gazet habarlandyrýlaryn qarjylandyrýǵa jumsaǵan. Onyń ornyna Sebastıan Kýrtstyń partııasynyń artyqshylyǵyn kórsetetin qoǵamdyq pikir saýalnamasyn jarııalaǵan.

Bul - Kýrtstyń bılikke kelýine, keıinnen kantsler laýazymyna qol jetkizýine arnalǵan jospardyń bir bóligi bolýy múmkin.