Avstrııa Italııamen shekaradaǵy baqylaýdy kúsheıtpek
ASTANA. QazAqparat - Avstrııa Italııamen aradaǵy shekarasyn qabyrǵamen qorshamaq. Bul týraly Tırol provıntsııasynyń basshysy Helmýt Tomak málimdedi, dep jazady «VVS» agenttigi.
400 metrlik dýal Avstrııanyń Tırol aımaǵyn ıtalııalyq Ońtústik Tırol provıntsııasynan bólip otyrǵan Alpi taýlaryndaǵy Brenner asýynda salynýy múmkin.
Tomaktyń aıtýynsha, dýaldyń salyný-salynbaýy Italııanyń Avstrııamen arasyndaǵy kelisimge baılanysty bolyp otyr. Bıik qabyrǵa elge keletin mıgranttar aǵynyn ustap turýǵa kómektesýi tıis. Bul - Avstrııanyń elde shekaralyq baqylaýdy engizýge jasaǵan qadamy. Sonymen qatar, Avstrııa shekaradan ótetin jeke kólikterdi, júk kólikteri men poıyzdardy tekserýdi qolǵa almaq.
Italııa saıasatkeri Matteo Rentsı Brennerdi jabý EO-nyń ishki erejelerin buzý dep málimdedi. Onyń aıtýynsha, bul sheshim birikken Eýropanyń bolashaǵyna qaýip tóndiredi.
Italııa úshin shekaralyq baqylaýdyń engizilýi kúrdeli soqqy bolmaq, sebebi bul - Alpide kólikter eń kóp júretin jol. Italııa ol arqyly óziniń negizgi saýda seriktesi Germanııamen qatynasyp otyr.
