Avstralııalyqtar alyp janýarlardy abaısyzda joıyp jibergen
ASTANA. Qańtardyń 28-si. QazAqparat - Paleontologtar Avstralııanyń aýmaǵynda tirshilik etken ejelgi alyp janýarlardyń (megafaýna) yqtımal qyrylý sebebine adamnyń yqpaly bolǵanyn anyqtady,
dep habarlaıdy QazAqparat Lenta.rý saıtyna silteme jasap.
Jańa zertteýlerdiń aıasynda ǵalymdar alyp janýarlardyń súıekteri men tisteriniń bólshekterine elektrondy paramagnıtti áser týdyratyn ádistiń kómegimen merzimin belgileýdi júrgizdi. Nátıjesinde olarǵa tabylǵan qaldyqtardyń jasy 50 myń jyldan aspaıtynyn anyqtaýdyń sáti tústi. Munyń aldynda topyraqtaǵy kómir quramy men kvartsty krıstaldardyń merzimin belgileýge arnalǵan ádis múldem basqa mándegi kórsetkishti bergen bolatyn.
Zertteýshilerdiń aıtýynsha, avstralııalyq megafaýna budan 40 myń jyl buryn joıylǵan, al adamdar kontınentti 45-60 myń jyl buryn qonystana bastaǵan. Osylaısha, jańa nátıjeler megafaýna men adamdardyń, jalpy alǵanda, bertinde ǵana birge ómir súrgenin kórsetti. Bul jaǵdaı ǵalymdardyń aıtýynsha, janýarlardyń qyrylýyna adamdar sebepshi bolǵanynyń dáleli bolyp tabylady.
