Avstralııalyq mıllıarder áıgili «Tıtanıktiń» kóshirmesin qurastyrdy
ASTANA. 4 naýryz. QazAqparat - «Tıtanık-2» alyp kemesiniń bıleti úshin bolashaq jolaýshylar mıllıon AQSh dollaryn tárki etýge daıyn, dep habarlaıdy 24.kz.
Avstralııalyq mıllıarder Klaıv Palmer áıgili «Tıtanıktiń» kóshirmesin qurastyrdy. Jańa laıner 2016 jyly sý aıdynyna jiberilýi múmkin. Kemeniń tehnıkalyq qaýipsizdigi zamanaýı jabdyqtarmen qamtamasyz etilmek. «Jańa kemeniń sýǵa batyp ketýi múmkin be?» degen suraqqa, joba avtory «ıá, oǵan jaryqshaq jasap qoısaq, ondaı jaǵdaı bolýy múmkin» degen jaýap qaıtardy. Degenmen, «Tıtanıkte» qaza tapqan adamdardyń týystary bul týraly san túrli pikir aıtýda. Bireýleri tipti synǵa alsa, tiri qalǵan Margaret Braýnnyń nemereleri «bul - 1912 jyly bolǵan keme apatyndaǵylarǵa kórsetilgen qurmet» degen oıda.
- Men bul jobany «Tıtanıkte» mert bolǵandar men tiri qalǵan adamdardyń qurmetine jasalǵan dep qabyldaımyn. Meniń oıymsha, kez kelgen adam ózin sonaý kezeńniń tarıhyn óz basynan ótkergendeı bolýy kerek. Jańa «Tıtanık» bortynda ár adam ózgeshe kúıge bólenetinine senemin,- deıdi «Tıtanık» jolaýshysynyń shóberesi Helen Bentsıger.
