Avstralııalyq áýe kompanııasynyń ushaǵy eń uzaq reıs jasap, rekord ornatty
NЬıÝ-IORK. QazAqparat - Avstralııalyq Qantas áýe kompanııasy eń uzaq kommertsııalyq jolaýshylar reısin jasady, dep habarlaıdy VVS.
Sapardyń maqsaty saıahattyń ushqyshtarǵa, ekıpajǵa jáne jolaýshylarǵa qalaı áser etetinin anyqtaý edi.
Bortynda 49 adamy bar Boeing 787-9 ushaǵy Nıý-Iorkten Sıdneıge 16 200 shaqyrym qashyqtyqty 19 saǵat 16 mınýt boıy toqtaýsyz ushyp ótti.
Kompanııa kelesi aıda Londonnan Sıdneıge deıin kidirissiz ushyp barýdy josparlap otyr.
Qantas kompanııasy mundaı áýe baǵyttaryn 2019 jyldyń sońyna deıin túbegeıli iske qosýdy kózdeıdi. Sheshim qabyldanǵan jaǵdaıda atalmysh reıster 2022 nemese 2023 jyldary jumys isteı bastaıdy.
VVS-diń málimetinshe, ázirge birde-bir kommertsııalyq ushaq jolaýshy men júk toltyryp alyp, osyndaı uzaq reıs jasap kórmegen.
Jol-jónekeı eshqaıda qonbaý úshin áýe kemesi janarmaıdy barynsha toltyryp, shekteýli mólsherde ǵana júk tıep ushty.
Bortqa otyrǵan kezde saǵattaryna Sıdneı ýaqytyn ornatqan jolaýshylar Avstralııanyń shyǵysynda kún batqansha uıyqtaǵan joq. Olarǵa alty saǵattan soń kómirsýǵa baı taǵamdar berildi. Sodan keıin jolaýshylar tez uıyqtap ketýi úshin ushaqta jaryq sóndirildi.
Mamandar borttyq synaqtar arqyly mıdyń pılottyq tolqyndaryn, melatonın deńgeıin jáne sergektik sezimin baqylap, kóptegen ýaqyt beldeýleriniń adam aǵzasynda toǵysý áserin taldady.
Aıta keteıik, byltyr «Sıngapýr áýe joldary» kompanııasy Sıngapýrdan Nıý-Iorkke shamamen 19 saǵatqa sozylatyn ushý reısin ashty, qazirgi tańda ol álemdegi eń uzaq kommertsııalyq turaqty reıs bolyp sanalady.
Sondaı-aq byltyr Qantas kompanııasy Pert – London baǵyty boıynsha 17 saǵattyq reısti iske qosty, al Qatar Airways kompanııasy Oklend pen Doha arasynda 17,5 saǵattyq reısti júzege asyryp keledi.
