Avstralııalyq áskerı keme malaızııalyq Boeing ushaǵyn izdestirýdi jalǵastyrmaq
ASTANA. QazAqparat - Avstralııalyq Ocean Shield áskerı korabli Úndi muhıtynyń ońtústik bóliginde joǵalyp ketken malaızııalyq Boeing ushaǵynyń synyqtaryn izdestirý aımaǵyn sholyp shyqpaq.
Bul týraly AVS telearnasy habarlady dep jazady Gazeta.rý. Korbalden Bluefin-21 avtonomdy sý asty apparaty teńizge túsirilmek. AQSh VMS kapıtany Mark Mettıýstiń aıtýynsha, izdestirý aımaǵyna jetý úshin kemege úsh kún ýaqyt kerek. «Bul aımaq tolyqtaı tekserilgen joq, sondyqtan ushaqty izdestirý jumystaryn jalǵastyramyz», - dedi Mettıýs. Esterińizge sala keteıik, Kýala-Lýmpýr-Beıjiń baǵytyna bet alǵan Boeing 777-200 ushaǵy radarlar ekranynan 8 naýryzǵa qaraǵan túni joǵalyp ketken bolatyn. Ushaq bortynda 239 adam bolǵan.
