Avstralııadan Soltústik Qazaqstanǵa 305 bas aberdın-angýs iri qarasy jetkizildi
ASTANA. KAZINFORM- Avstralııadan Qazaqstanǵa aberdın-angýs tuqymyna jatatyn 305 bas asyl tuqymdy iri qara jetkizildi. Bul – Soltústik Qazaqstan oblysyna osy tuqymdy maldyń Avstralııadan alǵash ret ákelinýi, dep habarlaıdy QR Aýyl shaýrashylyǵy mınıstrliginiń baspasóz qyzmeti.
Jalpy, 2026–2030 jyldarǵa arnalǵan mal sharýashylyǵyn damytýdyń keshendi jospary aıasynda elge 40 myń bas iri qara men 10 myń bas usaq mal satyp alý kózdelgen. Búginde Qazaqstanǵa 9,5 myńǵa jýyq iri qara jetkizildi.
Mal Astana halyqaralyq áýejaıyna Qatar Airways Cargo áýe kompanııasynyń arnaıy júk reısimen jetkizildi.
Ónimdiligi joǵary mal basyn ımporttaý Memleket basshysynyń tapsyrmasyna sáıkes júzege asyrylyp jatyr. Keshendi jospar otandyq asyl tuqymdy mal sharýashylyǵynyń áleýetin nyǵaıtýǵa, tabynnyń genetıkalyq sapasyn jaqsartýǵa, tól ósirý isin damytýǵa jáne básekege qabiletti mal sharýashylyǵy ónimderiniń óndirisin ulǵaıtýǵa baǵyttalǵan.
-Asyl tuqymdy mal bazasyn nyǵaıtý – mınıstrlik jumysynyń negizgi baǵyttarynyń biri. Qazirgi ýaqytta elimizge 9,5 myńǵa jýyq iri qara ákelindi. Búgin aberdın-angýs tuqymyna jatatyn 305 bas maldyń kezekti legin qarsy aldyq. Soltústik Qazaqstan oblysyna bul tuqymdy mal Avstralııadan alǵash ret jetkizilip otyr. Jalpy, 40 myń bas iri qara jáne 10 myń bas usaq mal satyp alý josparlanǵan, – dedi aýyl sharýashylyǵy vıtse-mınıstri Ermek Kenjehanuly.
Mal basyn asyldandyrý jáne jańartý jumystaryna «Shal aqyn AGRO-2020» jáne «Asyl Farms» seriktestikteri qatysyp jatyr.
-Etti mal sharýashylyǵyn damytý – bizdiń sharýashylyq úshin óndiristi ártaraptandyrýǵa jáne ózimizdiń jemshóp bazasyn tıimdi paıdalanýǵa múmkindik beredi. Biz aberdın-angýs tuqymyn bordaqylaý kórsetkishteriniń joǵarylyǵy men et sapasynyń jaqsy bolýyna baılanysty tańdadyq. Avstralııadan ákelingen asyl tuqymdy maldyń genetıkalyq áleýeti joǵary, ónimdi tabyn qalyptastyrýǵa, aldaǵy ýaqytta Soltústik Qazaqstan oblysynyń ózinde asyl tuqymdy mal ósirý men kóbeıtýdi damytýǵa jol ashady, – dedi «Asyl Farms» seriktestiginiń dırektory Ǵabıden Balǵynbekov.
Soltústik Qazaqstan oblysy asyl tuqymdy mal sharýashylyǵyn damytý ortalyqtarynyń birine aınalyp keledi. Óńirde asyl tuqymdy mal satyp alýǵa baǵyttalǵan jalpy quny 15 mlrd teńgeni quraıtyn 23 jobadan turatyn pýl qalyptastyrylǵan.
Jyl basynan beri oblysqa Germanııa men Danııadan 3 myńnan astam analyq mal ákelindi. Jyl sońyna deıin Avstralııadan asyl tuqymdy mal jetkizetin taǵy 10 áýe reısin qabyldaý josparlanyp otyr. Boljam boıynsha, óńirge ımporttalatyn maldyń jalpy sany 11 myńǵa jýyq iri qara men 1,5 myńnan astam usaq malǵa jetedi.
Sonymen qatar óńirde salanyń turaqty damýyna qajetti ınfraqurylym jetildirilip jatyr. Qazirgi ýaqytta Soltústik Qazaqstan oblysynda 118 taýarly-sút fermasy jumys isteıdi. Onyń 50-i – zamanaýı keshender. Budan bólek, jalpy qarjylandyrý kólemi 1,5 mlrd teńgeni quraıtyn 57 veterınarııalyq bekettiń qurylysy júrgizilýde.
-Asyl tuqymdy mal ımporttaý mal basyn kóbeıtýmen qatar, mal sharýashylyǵyn uzaq merzimdi damytý tetigi retinde qarastyrylyp otyr. Ozyq genetıkany engizý, veterınarııalyq ınfraqurylymdy jańǵyrtý, selektsııalyq jumysty jetildirý jáne otandyq mal ósirý júıesin damytý tabyn ónimdiligin arttyrýǵa, eldiń azyq-túlik qaýipsizdigin nyǵaıtýǵa jáne Qazaqstanda óndiriletin básekege qabiletti ónim kólemin ulǵaıtýǵa baǵyttalǵan,-delingen habarlamada.
Aýyl sharýashylyǵy jalpy óniminiń kólemi 1,9 ese ósti.
