Avstralııadaǵy órtti jańbyr sál báseńdetkenimen, tilsiz jaý qaıta órshýi múmkin
KANBERRA. QazAqparat – Avstralııa búkil qurlyqty jalmaǵan tilsiz jaýmen tynymsyz kúres júrgizip jatyr. Aýa temperatýrasynyń joǵarylyǵy men qurǵaqshylyq órtti tipti órshitip tur, dep habarlaıdy QazAqparat tilshisi BBC-ge silteme jasap.
Avstralııanyń órtten japa shekken aýdandaryna jańbyr jaýa bastady. Aýa temperatýrasy da tómendegen. Dese de, sheneýnikter órttiń tyń serpinmen órshýi múmkin ekenin eskertedi. Tilsiz jaýdy aýyzdyqtaý syzyǵyn bekemdep alý úshin qutqarýshylar aýa temperatýrasynyń tómendeýin sátti paıdalanyp qalýǵa tyrysyp jatyr.
Jańbyr Sıdneıden Melbýrnǵa deıingi shyǵys jaǵalaýǵa jaýǵan. BBC-diń habarlaýynsha, Jańa Ońtústik Ýelstiń keıbir bóliginde ótpeli jaýyn júrip ótken. Jańbyr sýynyń quramyna kúıe sińip ketken. Jaýyn osydan qap-qara bolyp jaýyp tur.
Sheneýnikterdiń málimdeýinshe, jumaǵa qaraı aýa temperatýrasy qaıtadan shuǵyl kóteriledi. Olardyń aqparatyna saı, Vıktorııa men Jańa Ońtústik Ýelstegi órt qosylyp ketip, ahýal tipti ýshyǵýy múmkin.
Avstralııada aýanyń lastanýy qaýipti jaǵdaıda qalyp otyr. Avtralııanyń saqtandyrý keńesi keltirilgen shyǵynǵa baılanysty qyrkúıekte órt bastalǵaly beri 700 mln avstralııalyq dollar (369 mln fýnt sterlıng) somasyna 9 myń saqtandyrý talaby satylǵanyn málimdedi.
Qazynashy Djosh Frıdenbergtiń ABC-ǵa bergen habarlamasyna saı, órttiń ekonomıkalyq shyǵyny jaıly birdeńe deýge áli erte. Qyrkúıekte 25 adam men mıllıonǵa tarta jan-janýar kóz jumyp, 2 myńǵa tarta úı jermen-jeksen bolǵan.
Al premer-mınıstr Skott Morrıson aldaǵy eki jylda órt shyǵynyn qalpyna keltirý úshin 2 mlrd avstralııalyq dollar (1,4 mlrd dollar; 1,1 mlrd fýnt) bólinetinin málim etti.
Foto: newsone.ua
