Avstralııada jaǵalaýdaǵy 200-den astam úı órtenip ketti
KANBERRA. QazAqparat - Avstralııa jaǵalaýynda 200-den astam úı órtenip ketti, dep habarlaıdy QazAqparat VVS-ge silteme jasap.
Basylymnyń habarlaýynsha, Vıktorııa shtatyndaǵy Shyǵys Gıppslendte kem degende 43 úı órtense, Jańa ońtústik Ýelste órtenge úılerdiń sany 200-den asady.
«Seısenbi kúni evakýatsııa jasaı almaǵan, qaladaǵy úıleri órtke oranǵan myńdaǵan turǵyn jaǵalaýǵa qashqan edi. Jaǵdaı azdap jaqsaryp, bas jol birneshe jolǵa ashylǵanda halyqtyń shyǵýyna múmkindik paıda boldy. Degenmen, jańa jyldyń alǵashqy saǵattarynda Jańa Ońtústik Ýelste 112 úı órtenip jatty», dep jazady VVS.
Jańa Ońtústik Ýelstiń premer-mınıstri Gledıs Berejıklıan tótenshe jaǵdaı qyzmeti joldardy tazartyp, elektr energııasyn qalpynakeltirý úshin jumysshylar aýa raıynyń qolaıly bolǵanyn kútetinin aıtty. Sonymen qatar senbi kúni aýa temperatýrasy kóteriletinin eskertti.
Órt saldarynan keminde úsh adam qaza tapty. Olardyń ekeýi, 63 jastaǵy ákesi men 29 jastaǵy uly órtten úıi men qurylǵylaryn qutqarmaq bolyp qaza tapsa, taǵy bir adamnyń denesi kólik ishinen tabylǵan. Osylaısha osy kezeńde órtten qaza tapqan adamdar sany 13-ke jetti.
Avstralııa úkimeti Jańa Ýels pen Vıktorııadaǵy órtti sóndirýge kómektesý úshin qosymsha ushaq, tikushaq pen qaıyq jiberiletinin málimdedi. Olar jibergen kómek órt ornyna juma kúni jetýi tıis.
