Avstralııada ushaqqa jasalmaq bolǵan lańkestik árekettiń joly kesildi
ASTANA. QazAqparat - Avstralııanyń premer-mınıstri Malkolm Ternbýll ushaq joıýǵa baǵyttalǵan lańkestik árekettiń áshkere bolǵandyǵyn málim etti, dep habarlaıdy Frans Press agenttigi.
«Ótken túnde ushaqty apatqa ushyratý maqsatynda jasalmaqshy bolǵan lańkestik áreketke qarsy iri operatsııa jasaldy», - dedi ol jýrnalısterge bergen suhbatynda.
Saıasatkerdiń málimetinshe, Sıdneıdegi reıd barysynda tórt adam ustalǵan. Avstralııanyń barlyq áýejaılarynda qosymsha qaýipsizdik sharalary júrgizildi. Ternbýlldyń sózderine súıensek, josparlanǵan shabýyldy bir ǵana lańkestiń júzege asyrýy múmkin emes.
Sodyrlardyń ushaqty qoldan jasalǵan qurylǵynyń kómegimen jarmaqshy bolǵandyǵy anyqtaldy.
Daily Telegraph basylymy lańkestik toptyń shabýyldy ishki reıske jasaýdy josparlaǵandyǵyn jazady.
Polıtsııa komıssary Endrıý Kolvınniń habarlaýynsha, ustalǵan azamattardyń «ıslamshyldyq» astyrtyn áreketterine qatysy bolýy múmkin. Ol sondaı-aq, quqyq qorǵaýshylardyń ázirge «atalǵan shabýyl jaıly naqty málimetterden, bolǵan jeri men ýaqyty jaıly aqparattardan» habarsyz ekendigin aıtty. Tekserý jumystary «uzaq ári baıaý» júrgiziletin sııaqty.
