Avstralııada urylar altyn tis úshin 180 qabirdi qazyp, tonaǵan
ASTANA. KAZINFORM — Avstrııanyń Tómengi Avstrııa aımaǵyndaǵy 18 zıratta belgisiz adamdar 180-ge jýyq molany qazyp, altyn tister men qundy zattardy urlaǵan. Qylmystyq áreket 2025 jylǵy sáýirden 2026 jyldyń sáýirge deıin jalǵasqan, dep habarlaıdy Kazinform agenttiginiń menshikti tilshisi avstrııalyq Heute basylymy men jergilikti polıtsııaǵa silteme jasap.
Avstrııalyq BAQ-tyń habarlaýynsha, qaskúnemder máıit jatqan qabir taqtalaryn jyljytyp, tabyttardy ashyp ne jaryp, marqumdardyń súıegin teksergen.
Keıbir qabirlerde marqumdardyń tisterin julyp, tipti tómengi jaq súıegin syndyryp alǵan. Qylmys izin jasyrý úshin aýyr taqtalardy qaıta ornyna qoıǵandyqtan, keıbir qabirlerdiń ashylǵany birneshe aptadan keıin ǵana belgili bolǵan.
Polıtsııa qabirlerdi qorlaý jáne buzyp kirip, urlyq jasaý derekteri boıynsha tergeý júrgizip jatyr. Tergeýshiler qylmysty birneshe adamnan quralǵan top jasaǵan dep sanaıdy. Óıtkeni aýyr qulpytas taqtalary men zildeı tabyttardy bir adamnyń qozǵap, ashýy qıyn. Ázirge kúdiktiler anyqtalǵan joq, aıǵaqtar da az.
Qylmystyq áreketter 2024 jyly Vena men Býrgenlandtyń soltústiginde bastalyp, keıin Tómengi Avstrııaǵa deıin taralǵan. Kornoıbýrgte ondaǵan saǵana búlinse, Grosvaıkersdorfta 50-ge jýyq qabir ashylǵan. Qylmyskerler belgili bir dinı qaýymǵa nemese áleýmettik topqa tıesili adamdardyń qabirlerin ǵana nysanaǵa almaǵan.
Marqumdardyń jaqyndary úshin bul oqıǵa aýyr soqqy boldy. Keıbiri týystarynyń qabirin ózderi tekserse, endi biri keltirilgen shyǵyndy anyqtaý úshin saǵanalardy óz qarajatyna ashtyrǵan. Polıtsııa urlyqty dáleldeý ońaı emes ekenin atap ótti. Sebebi marqumdardyń týystary olardyń altyn tisteri bolǵanyn nemese tabytqa baǵaly zattar salynǵanyn bile bermeıdi.
Eske salaıyq, buǵan deıin Qazaqstanda jerleý rásiminiń baǵasy ózgergenin habarlaǵanbyz.
