Aýstralııada tapsyryspen kisi óltirmek bolǵan 15 jastaǵy jasóspirim tutqyndaldy

SIDNEI. KAZINFORM — Aýstralııa polıtsııasy Shvetsııadan kelgen 15 jastaǵy jasóspirimdi tutqyndady. Ol arnaıy shıfrlanǵan jabyq baǵdarlamalar arqyly óz elinde jáne Danııada jaldamaly kisi óltirýshilerdi jaldamaq bolǵan, dep habarlady Kazinform agenttiginiń menshikti tilshisi.

Shvetsııalyq jasóspirim seısenbi kúni tańerteń Aýstralııanyń Sıdneı qalasynda tutqyndaldy. Oǵan «aqshaǵa tapsyryspen kisi óltirý» boıynsha halyqaralyq operatsııany shıfrlanǵan qosymsha arqyly júrgizýge talpyndy degen kúdik taǵyldy.

Danııa polıtsııasy bastyǵynyń orynbasary Lars Feldt-Rasmýssenniń aıtýynsha, bul áreket Skandınavııa aımaǵyndaǵy jalǵasyp kele jatqan bandalyq qaqtyǵystarmen baılanysty bolýy múmkin.

— Jasóspirim Danııa men Shvetsııada tapsyryspen kisi óltirý úshin adamdardy jaldamaq boldy degen kúdikke ilindi, — dedi ol.

SVT telearnasynyń málimetinshe, ol bir ret ınternet arqyly bir adamǵa Danııada kisi óltirý úshin 200 myń shved kronyn jáne qarý usynǵan.

Qazir aty-jóni jarııalanbaǵan bozbalanyń ústinen eki elde — Aýstralııada jáne Danııada — qylmystyq is qozǵaldy.

Oǵan telekommýnıkatsııalyq jeli arqyly qurylǵyny paıdalanyp, asa aýyr qylmys – kisi óltirýdi uıymdastyrý maqsatynda sóz baılasý áreketin jasaǵany úshin aıyp taǵylyp otyr. Taǵy bir aıyp – dál sol maqsatpen kisi óltirýge árekettený.

15 jastaǵy jasóspirim ómir boıy bas bostandyǵynan aıyrylýy múmkin.

Aıta keteıik, bıylǵy aqpanda Shvetsııada oqý ornynda bolǵan atys kezinde shamamen 10 adam qaza tapqan edi.

Eske sala keteıik, Aýstralııada tórt balasyn óltirgeni úshin 20 jyl túrmede otyrǵan áıel ǵylymnyń arqasynda bostandyqqa shyqqan bolatyn.