Avstralııada óli kengýrý kesirinen bir top veloshabandoz aýrýhanaǵa tústi
ASTANA. QazAqparat - Avstralııanyń Vıktorııa shtatynda 21 naýryzda bir velosıpedshiler toby jolda jatqan kengýrý óleksesine soǵyldy. Veloshabandozdardyń biri jaraqat alyp, aýyr jaǵdaıda aýrýhanaǵa jetkizildi. Alty adam túrli dárejede jaraqat aldy, dep jazady theage.com.ua.
Oqıǵa Sheppartonǵa jaqyn Melbýrnnan 200 shaqyrym jerde oryn aldy. Polıtsııa ókiliniń aıtýynsha, toǵyz veloshabandozdy bastap kele jatqan adam kengýrýdy kórip, burylyp úlgergenimen, artynda kele jatqandar baıqamaı qalǵan.
«Qalǵandary kengýrýǵa soǵylyp, biriniń artynan biri qulaǵan», - dedi oqıǵa ornyna jetken polıtseılerdiń biri.
Keıbiri jaltaramyn dep qarsy betke shyǵyp kele jatqan kólikke soqtyǵysqan. Zardap shekken 50 jastaǵy er adam kólik astynda qalyp, aýyr jaraqat aldy. Ol Melbýrndaǵy Alfreda gospıtaline jetkizildi.
Shepparton polıtsııasynyń habarlaýynsha, tań atyp kún shyǵyp kele jatqan kezde joldy baıqaý qıyn bolǵan.
