Avstralııada G20 sammıti bastaldy
ASTANA. QazAqparat - Búgin Avstralııanyń Brısben qalasynda «Úlken jıyrmalyqtyń» sammıti bastald, dep habarlady 24.kz.
Ekikúndik forým aıasynda ekonomıkalyq ósim, jumyspen qamtý jáne táýekelmen kúres sııaqty máseleler talqylanady. Sondaı-aq, alqaly jıynda álemdik ekonomıkalyq jaǵdaı men halyqaralyq saýda jáne energetıka salalaryndaǵy túıtkilder qaralyp, daǵdarysqa qarsy turýdyń joldary ortaǵa salynbaq.
Brısbenniń konferentsııalyq ortalyǵynda bastalǵan aýqymdy shara saltanatty túrde ashyldy. Birinshi qatarǵa jaıǵasqan álem elderiniń basshylary Avstralııanyń baıyrǵy turǵyny aborıgenderdiń dástúrli bıin tamashalady. Sahnalyq qoıylymdar aıaqtala salysymen «Úlken jıyrmalyqtyń» kóshbasshylary alǵashqy jumystyq kezdesýlerin ótkizdi. G20 sammıti - jahandyq ekonomıka men qarjy salasyndaǵy máselelerdi qarastyryp, olardy talqylaıtyn alqaly jıyn. «Jıyrmalyq» tobyna álemdegi 19 el men Eýroodaq múshe. Álemdik saýda men onyń ishki jalpy óniminiń 80%-y sonyń enshisinde. Al halyq sanyna keler bolsaq, jer sharyndaǵy adamdardyń 1/3 osy «Úlken jıyrmalyqta» turady.
«Bul jolǵy forýmnyń basty maqsaty jetekshi elderdiń ekonomıka men qarjy salasynda bir judyryqtaı jumyla jumys jasaýdy uıymdastyrý», - dedi Avstralııa Premer-Mınıstri Tonı Ebbott. - Biz saýdanyń erkin bolǵanyn qalaımyz. Qalaıda oǵan qol jetkizemiz. Infraqurylymnyń da kóbeıgeni kerek. Biz qazir mańyzdy qurylymdyq reformalardy qolǵa aldyq. Áleýetti ómir súrý úshin bıýdjetti bir jerge shoǵyrlandyrý qajet. Búkil álemge joldar úndeýimiz osy».
Resmı Kanberranyń bastamasymen «Úlken jıyrmalyqqa» múshe elderi aldaǵy 5 jylda ekonomıkalyq ósimdi taǵy 2%-ǵa arttyrýmen qosa, ekonomıkalyq belsendilikti 2 trln AQSh dollaryna ulǵaıtý jáne mıllıondaǵan jańa jumys ornyn ashý týraly kelisti. Alaıda, jergilikti kásipkerlerdiń aıtýynsha, sammıtke baılanysty engizilgen qaýipsizdik sharalarynyń kesirinen jumystary toqtap qaldy. Sońǵy jyldary halyqaralyq forýmmen qatar jappaı ereýil uıymdastyrý sánge aınalǵan. Jahandanýǵa qarsy qaýym men qorshaǵan ortany qorǵaýshy belsendiler, qala berdi bir jynysty nekeni qoldaıtyn jandar qazirgi tańdaǵy álemdik qurylymǵa qarsylyǵyn bildirip qalǵysy keledi.
