Avstralııada aýrý kıt jaryp jiberildi
ASTANA. Qyrkúıektiń 3-i. QazAqparat - Avstralııalyq bılik ókilderi osydan eki apta buryn Pertanyń ońtústik-shyǵysynan 400 shaqyrym jerdegi Olbanı qalasynyń jaǵasyna shyǵyp qalǵan aýrý búkir kıtti jaryp jiberý týraly sheshim qabyldady, dep habarlaıdy Associated Press.
Uzyndyǵy 9,5 metr bolatyn kıt jaǵaǵa shyǵyp qalǵanda, Avstralııanyń tabıǵat qorǵaý vedomstvosynyń ókilderi ony emdep, qaıtadan teńizge bosatyp jiberýge talpynys jasady, biraq odan túk shyqpady. Osydan keıin janýardy jarylǵysh zattyń kómegimen óltirý týraly sheshim qabyldandy.
Aıta ketý kerek, jaǵaǵa shyǵyp qalǵan kıtterge kómektesý múmkin bolmaǵan jaǵdaıda, ony jarylǵysh zattyń kómegimen jaryp jiberýge Kıt aýlaý boıynsha halyqaralyq komıssııa ruqsat bergen. Uıym ókilderiniń aıtýynsha, jaǵaǵa shyǵyp qalǵan kıtti atys qarýymen óltirý maqsatsyz ári adamgershilikke jatpaıtynyn aıta kele, osy sekildi asa kúrdeli jaǵdaılarda jarylǵysh zat qoldanýǵa keńes beredi.
Búkir kıtter - iri teńiz janýarlary, olar keı ýaqyttarda 40-50 jasqa deıin ómir súredi. Eresek kıttiń denesiniń uzyndyǵy 14 metrge deıin jetýi múmkin. Eresek búkir kıttiń ortasha salmaǵy shamamen 30 tonna bolady. Bul kıtter balyq, shaıantárizdiler men bylqyldaq denelilermen qorektenedi.
