Avstralııada alyp medýza tabyldy
ASTANA. QazAqparat - Avstralııanyń Tasmanııa aralynyń jaǵasynan buryn-sońdy beımálim bolǵan alyp medýza tabyldy. Dıametri bir jarym metrlik medýzany jaǵajaıda serýendep júrgen demalýshylar taýyp alǵan, dep habarlaıdy VVS.
Avstralııanyń qorshaǵan ortany qorǵaý agenttiginiń mamany Lıza-Enn Gershvınniń aıtýynsha, ǵalymdar alyp medýzalardyń bary týraly biraz ýaqyttan beri biledi. Alaıda, sońǵy tabylǵan teńiz jándigi burynnan belgili medýzalardyń birine de uqsamaıdy.
Atalmysh medýza tabylǵan kezde óli bolǵan. Ádette olar jaǵaǵa jaqyn kelmeıdi. Gershvınniń paıymdaýynsha, ol tsıaneıa tobyna jatatyn medýzanyń ázirge zerttelmegen túri.
Sońǵy jyldary Tasmanııanyń jaǵalaýynda medýzalardyń kóbeıip ketkeni baıqalady. Osyǵan oraı, ǵalymdar jándikterdiń ne sebepti jaǵaǵa tym jaqyndap ketkenin anyqtaı almaı otyr.
