Avstralııada 5 metrlik qoltyraýynnyń ishinen adam denesiniń qaldyǵy tabyldy
ALMATY. QazAqparat - Avstralııanyń Kakadý saıabaǵyndaǵy 5 metrlik qoltyraýynnyń asqazanynan adam denesiniń qaldyǵy tabyldy. Bul týraly Associated Press agenttigi habarlady.
Polıtsııa qyzmetkerleriniń paıymdaýynsha, ol joǵalyp ketken 62 jasar týrıstiń denesi bolýy múmkin.
Qaıǵyly oqıǵa 7 maýsymda oryn alǵan. 5 metrlik alyp reptılııa qaıyqta serýendep júrgen adamdarǵa shabýyl jasap, 62 jasar er adamdy súırep ketken bolatyn. Jantúrshigerlik oqıǵa er adamnyń zaıyby, kelini men balasynyń kóz aldynda boldy. Jaqyndary ony sońǵy ret qoltyraýynnyń azýynan kórgen bolatyn.
Amaly quryǵan polıtsııa qyzmetkerleri janýardy atýǵa májbúr boldy.
Ázirge, aty atalmaı otyrǵan azamattyń denesi dál sol ekendigi anyqtalǵan joq.
Bul Avstralııa qoltyraýyndarynyń adamdarǵa qarsy birinshi shabýyly emes. Osyǵan deıin kólde shomylyp júrgen 12 jasar er bala men 7 jasar qyz bala alyp qoltyraýynnyń azyǵyna aınalǵan edi.
