Avstralııa úshin 2013 jyl rekordtyq deńgeıde ystyq boldy
ASTANA. 4 qańtar. QazAqparat - Avstralııa úshin 2013 jyl búkil zertteýler tarıhynda eń ystyq jyl boldy. Bul týraly Avstralııalyq meteorologııalyq bıýronyń zertteýlerine silteme jasaı otyryp, BBC News habarlaıdy.
Jyl boıy jınalǵan derekter boıynsha, 2013 jyly Avstralııadaǵy temperatýra 1910 jyldan bergi oryn alǵan ortasha temperatýradan 1,2 gradýs Tselsııge joǵary bolyp shyqqan. Buǵan bir jaǵynan erte kelgen kóktem men qurǵaq qys ta áser etken. Joǵary temperatýranyń kesirinen 1968 jyldan beri eń kúshti tabıǵı órtter oryn aldy.
Bul elde jyl saıyn aýa temperatýrasynan basqa sý temperatýrasy da birtindep joǵarylap keledi. Mamandardyń aıtýynsha, jylynýǵa ýly gazdardyń kóptep bólinýi men adamı faktorlar áser etýde. Sonymen qatar, meteorologtar ortasha temperatýranyń tek bul elde ǵana emes, jalpy álem boıynsha joǵarylap kele jatqanyn aıtýda.
Avstralııadaǵy ortasha temperatýra jyl boıy 23-24 gradýs Tselsıı mańynda bolady. Eldiń eń qurǵaq ári ystyq óńiri - soltústik-batysy. Onda jazdaǵy temperatýra 30 gradýstan asady. 2013 jyly temperatýranyń eń joǵary shegi 12 qańtarǵa dóp kelgen (dál osy qańtar aıy jyldaǵy eń ystyq aı bolǵan). Sol kúni Mýmba qalasyndaǵy aýa temperatýrasy 46,9 gradýsqa jetken.
