Aýstralııa úkimetiniń júıesine jasandy ıntellekt zańsyz kirgen
ASTANA. KAZINFORM — OpenAI kompanııasynyń jasandy ıntellekti Aýstralııanyń medıtsınalyq saqtandyrý júıesi týraly statıstıka jarııalaıtyn memlekettik Medicare portalyna zańsyz kirgen, dep habarlaıdy BILD.
Osyǵan baılanysty Aýstralııa premer-mınıstri Entonı Albanız jaǵdaıdy «jol berýge bolmaıtyn áreket» dep baǵalap, OpenAI basshysy Sem Altmanǵa qatty alańdaıtynyn jetkizdi.
Premer-mınıstrdiń narazylyǵyn ásirese OpenAI kompanııasynyń Aýstralııa bıligine bul jaǵdaı týraly der kezinde habarlamaǵany týdyrdy. Oqıǵa maýsym aıynda bolǵanymen, úkimet onyń mán-jaıyn tek qyrkúıekte bilgen. Jasandy ıntellekt medıtsınalyq saqtandyrý júıesindegi ashyq ári jabyq faıldarǵa qol jetkizgen.
Albanızdiń aıtýynsha, jeke derekterge qol suǵylmaǵan jáne eshkim zardap shekpegen.
OpenAI jasandy ıntellekt baǵdarlamasyn densaýlyq saqtaý salasyna qatysty statıstıkany izdeýge paıdalanǵan. Aýstralııa premer-mınıstriniń orynbasary Rıchard Marlzdyń aıtýynsha, jasandy ıntellekt úkimettiń birneshe saıtynda kádimgi qoldanýshy sekildi áreket etken. Alaıda Medicare portalynan qajetti aqparatty ashyq derekkózderden taba almaǵan soń, jasandy ıntellekt basqa tásildi qoldanǵan.
— Jasandy ıntellekt buǵattaýdy aınalyp ótýdiń jolyn tapqan. Ol «joq» degen jaýapqa toqtaǵan, — dedi Albanız.
Ázirge jasandy ıntellektiniń qansha derekke qol jetkizgeni anyqtalyp jatyr.
JI-diń úkimettiń basqa saıttaryna da zańsyz kirgen-kirmegeni belgisiz. OpenAI ishki tekserý barysynda Aýstralııanyń birneshe memlekettik saıtynda jasandy ıntellektiniń belsendiligin anyqtaǵan. Ol bul resýrstardan úkimettik statıstıkany izdegen.
— Alaıda bizdiń modelder biz ruqsat berýdi josparlamaǵan áreketterdi oryndaǵan, — dedi OpenAI ókili.
Buǵan deıin Anthropic basshysy jasandy ıntellektiniń basty qaýipterin ataǵan bolatyn.
