Avstralııa telearnalarynda Muhammed Paıǵambar (s.ǵ.s.) týraly jarnama kórsetý josparlanyp otyr
ASTANA. 2 shilde. QazAqparat - Qasıetti Ramazan aıynyń jaqyndaýyna baılanysty, avstralııalyq musylmandar telearnalarda ardaqty Muhammed Paıǵambar (s.ǵ.s.) týraly birneshe qysqasha jarnama kórsetýdi josparlap otyr. Bul is-sharanyń basty maqsaty halyqqa Muhammed Paıǵambardyń (s.ǵ.s.) shynaıy beınesin, búkil adamzat qoǵamyna úlgi bolǵany, paıǵambarlyq mıssııa qonǵannan bastap halyqqa ıslam dinin nasıhattaǵany týraly kórsetý. Bul týraly Qazaqstan musylmandary dinı basqarmasynyń resmı saıtynan habarlandy.
Konfessııaaralyq uıymnyń negizin qalaǵan Mypeace Dııa Muhammed The Australian-ǵa bergen suhbatynda bylaı dep málimdedi: «Ardaqty Muhammed Paıǵambar (s.ǵ.s.)-nyń ómirde kim bolǵany, nelikten musylmandar Paıǵambardy sonshalyqty qurmetteıtini jaıly baıandalady. Avstralııalyqtardyń kóbi Muhammed Paıǵambar (ǵ.s.)-dy bile bermeıdi jáne de sol bilmestiktiń nátıjesinde jalǵan aqparat taramas úshin, biz osyndaı is-sharany uıymdastyrdyq».
Uıymnyń josparlaýynsha, 9 shildeden bastap, Ramazan aıynyń sońyna deıin birneshe bólimderden turatyn rolıkter telearnalardan kórsetiledi. Bul rolıkterde belgili qoǵam qaıratkerleriniń Muhammed Paıǵambar (s.ǵ.s.) týraly aıtyp ketken sózderi jazylyp kórsetiledi. Atap aıtqanda, Mahatma Gandıdiń, Bernard Shoýdyń sózderin avstralııalyqtar 30 sekýndtyq rolıkte tamashalaı alady.
Toqtala ketsek, Mahatma Gandı paıǵambar jaıly mynandaı sózderdi aıtyp ketti: «Mıllıondaǵan adamdardy dinge shaqyryp, búkil adamzatqa úlgi bolǵan paıǵambardyń (s.ǵ.s.) ómirimen jaqyn tanysqym keledi. Alla taǵalanyń Elshisi halyqty zorlyqpen emes, óziniń kishipeıildiligimen jáne adaldyǵymen, batyldylyǵymen ıslam dinin qabyldaýǵa shaqyrdy».
Bernard Shoý óziniń esteliginde Muhammed paıǵambardyń (s.ǵ.s.) dinin qadirleıtindigi, qaı ýaqyt bolsa da bul dinniń mańyzy zor ekendigine kózi jetkendigin aıtqan. Bernard Shoý Paıǵambarymyzǵa «Adamzattyń qutqarýshysy» dep baǵa bergen eken.
