Avstralııa premer-mınıstri yqtımal qaýipke baılanysty Kanberra rezıdentsııasynan evakýatsııalandy
ASTANA. KAZINFORM – Avstralııa premer-mınıstri Entonı Albanız Kanberradaǵy óziniń resmı The Lodge rezıdentsııasynan yqtımal qaýipke baılanysty evakýatsııalandy, dep jazady Anadoly.
SBS News taratqan aqparatqa sáıkes, jergilikti ýaqyt boıynsha shamamen 18:00-de polıtsııa úkimet basshysynyń rezıdentsııasynda aýqymdy tekserý jumystaryn bastaǵan. Qaýipsizdik qyzmetteri ǵımarat aýmaǵyn tolyq baqylaýǵa alyp, tıisti rásimderdi júrgizgen.
Qaýipsizdigine qater tónip turǵany týraly habardan soń Albanız basqa qaýipsiz orynǵa kóshirilgen. Alaıda qazirgi sátte qoǵamdyq qaýipsizdikke tikeleı qaýip tóndiretin naqty faktorlar anyqtalmaǵany habarlanyp otyr.
Resmı málimetterge sáıkes, rezıdentsııa aýmaǵyndaǵy tekserý sharalary áli de júrip jatyr.
Osyǵan deıin Avstralııa Iran elshisi men úsh dıplomatty elden shyǵarǵany týraly jazdyq.