Avstralııa mańyndaǵy aralda krýız laınerinen qalyp qoıǵan jolaýshy qaza tapty

ASTANA. KAZINFORM — 26 qazan kúni Avstralııanyń Úlken Tosqaýyl rıfine kiretin shaǵyn Laızard aralyndaǵy jaıaý jol mańynan egde jastaǵy áıeldiń denesi tabyldy. Aldyn ala málimetter boıynsha, marqum — bir kún buryn aral mańynda bolǵan Coral Adventurer krýız laıneriniń jolaýshysy, dep jazdy DW.

60 kúnge sozylǵan, shamamen 45 myń eýro turatyn krýız baǵdarlamasy aıasynda saıahatshylarǵa Laızard aralyna baryp, snorklıng jáne haıkıngpen aınalysý usynylǵan. BAQ habarlaýynsha, jasy shamamen 80-degi áıel araldyń eń bıik núktesine deıin kóterile almaǵandyqtan, keri — aılaqqa qaıtýdy uıǵarǵan.

Alaıda keme ony qaldyryp, ketip qalǵanyn bilgen. Ekıpaj quramy áıeldiń joq ekenin baıqamaı, laıner jolǵa shyǵyp ketse kerek. Aralda qalǵan jolaýshy jalǵyz saıahattaǵandyqtan, onyń joǵalǵanyn eshkim birden ańǵarmaǵan. Áıeldiń joq ekeni tek keshki as kezinde belgili bolǵan. Túnge qaraı qutqarý qyzmetine habar berilip, keme aralǵa qaıta bet alǵan. Biraq tym kesh edi.

Qazir Avstralııa teńiz qaýipsizdigi basqarmasy bul oqıǵaǵa qatysty tergeý júrgizip jatyr. Tergeý barysynda Coral Adventurer ekıpajy suralmaq: áıeldiń ólim sebebi, ony nege aralda qaldyryp ketkeni, ne sebepti izdeý sharalary keshiktirilgeni jáne ony qutqarý múmkin bolǵan-bolmaǵany anyqtalady.

Soǵan qaramastan, krýız óz baǵyty boıynsha jalǵasatyny habarlandy.

Buǵan deıin álemdegi eń úlken laıner alǵashqy krýızine shyqqanyn jazǵan edik.