Avstralııa qyrkúıekte BUU Bas Assambleıasynda Palestına memleketin moıyndaıdy
ASTANA. KAZINFORM — Kanberranyń bul sheshimi eki apta buryn mundaı qadam jasamaıtynyn aıtqan úkimet saıasatynyń kúrt ózgerýi boldy, dep habarlaıdy Kazinform tilshisi.
Avstralııa premer-mınıstri Entonı Albanız dúısenbi kúni eldiń qyrkúıekte ótetin BUU Bas Assambleıasynyń 80-sessııasynda Palestına memleketin resmı túrde moıyndaıtynyn málimdedi.
Úkimet basshysynyń aıtýynsha, bul sheshim Kanberra Palestına ákimshiliginen alǵan mindettemelerge negizdelgen. Olardyń qatarynda — bolashaq úkimet quramynan HAMAS-ty shyǵarý, Gaza sektoryn qarýsyzdandyrý jáne 2006 jyldan beri ótpegen saılaýdy uıymdastyrý bar.
Statement on the recognition of the State of Palestine. pic.twitter.com/Mg0Ec8buo1
— Anthony Albanese (@AlboMP) August 11, 2025
— Avstralııa palestınalyq halyqtyń óz memleketine quqyǵyn moıyndaıdy jáne bul quqyqty shyndyqqa aınaldyrý úshin halyqaralyq qaýymdastyqpen jumys isteıdi, — dedi Albanız.
Ol bul qadamdy «eki memleket» sheshimin ilgeriletýge baǵyttalǵan úılestirilgen jahandyq kúsh-jigerdiń bir bóligi dep atady.
Premer-mınıstrdiń sózinshe, Palestına ákimshiligi sondaı-aq Izraıldiń beıbitshilik pen qaýipsizdik jaǵdaıynda ómir súrý quqyǵyn moıyndaýǵa, aýqymdy reformalar júrgizýge jáne terrorızm aıybymen sottalǵandarǵa, sondaı-aq shabýyl jasaǵandar qaza tapqan jaǵdaıda olardyń otbasyna beriletin tólem júıesin joıýǵa mindettendi.
Albanız sońǵy eki aptada bul máseleni Ulybrıtanııa, Frantsııa, Jańa Zelandııa, Japonııa kóshbasshylarymen, sondaı-aq Izraıl premer-mınıstri Bınıamın Netanıahý jáne Palestına basshysy Mahmýd Abbaspen talqylaǵanyn aıtty.
— Bizge áskerı emes, saıası sheshim qajet, — dep atap ótti ol.
Izraıl Avstralııa bastamasyn qatań synǵa aldy. Netanıahý muny «masqara» jáne «kóńil qaldyratyn» qadam dep atap, ony «terrorızmdi marapattaý» dep baǵalady. Izraıldiń Avstralııadaǵy elshisi Amır Maımon, The Times of Israel habarlaýynsha, mundaı moıyndaý «Izraıldiń qaýipsizdigin álsiretip, beıbitshilik perspektıvasyna nuqsan keltiredi» dedi.
Budan kóp uzamaı Jańa Zelandııanyń syrtqy ister mınıstri Ýınston Pıters óz eliniń Palestına memlekettigin moıyndaýy «múmkindik emes, ýaqyt máselesi» ekenin aıtty.
Buǵan deıin Ulybrıtanııa, Frantsııa jáne Kanada 2025 jylǵy qyrkúıekte ótetin BUU Bas Assambleıasy otyrysynda Palestınany moıyndaý josparyn jarııalaǵan bolatyn.