Avstralııa BAQ-ty qoldaý úshin Google, Meta jáne TikTok-qa salyq salady
ASTANA. KAZINFORM — Avstralııa úkimeti jýrnalıstıkany qarjylandyrý jáne redaktsııalardy qoldaý úshin iri tsıfrlyq platformalardyń tabysynyń bir bóligine salyq salýdy usyndy, dep habarlaıdy Associated Press.
Avstralııa bıligi Meta, Google jáne TikTok sııaqty tehnologııalyq kompanııalardy jýrnalıster eńbegine aqy tóleýge tabysynyń bir bóligin baǵyttaýǵa mindetteıtin zań jobasyn usyndy.
Qujat 28 sáýirde jarııalanyp, 2 shildege deıin parlament qaraýyna engiziledi.
Bastama áleýmettik platformalardy jańalyq uıymdarymen kelisimder jasaýǵa jáne olardyń kontentin paıdalanǵany úshin ótemaqy tóleýge yntalandyratyn qarjylyq mehanızm qurýdy kózdeıdi.
Anthony Albanese jýrnalıst eńbegi mindetti túrde tólenýi tıis ekenin atap ótti. Onyń aıtýynsha, iri halyqaralyq korporatsııalar jańalyq kontentinen ádil syıaqy tólemeı paıda kórmeýi kerek. Sondaı-aq ol jýrnalıstıkaǵa ınvestıtsııa salý tıimdi demokratııanyń jumys isteýi úshin mańyzdy ekenin aıtty.
Al tehnologııalyq kompanııalar ókilderi bul bastamany synǵa alyp, ony is júzinde «tsıfrlyq qyzmetterge salynatyn salyq» dep atady. Olardyń pikirinshe, usynylǵan model jarnama ındýstrııasyndaǵy ózgeristerdi eskermeıdi jáne medıa úshin turaqty qarjylandyrýdy qamtamasyz etpeıdi.
Bul — Avstralııanyń tsıfrlyq platformalardy óz servısterinde taratylatyn jańalyq kontenti úshin aqy tóleýge zań júzinde mindetteýge baǵyttalǵan ekinshi áreketi.
Buǵan deıin AQSh soty Google men Meta-ny áleýmettik jelidegi táýeldilik úshin $ 6 mln tóleýge mindettedi.
