Avstralııa ashyq chempıonatynda tennıs básekesi qyza túspek
ASTANA. QazAqparat - Jasyl qurlyqta ótip jatqan tennıs týrnıri aqtyq oıyndaryna jetip te qaldy. Erteń Avstralııa ashyq chempıonatynyń shırek fınaldyq matchtary ótpek.
Áıelder synyndaǵy shırek fınaldyq oıyndardyń eń qyzyqtysy Marııa Sharapova men Serena Ýılıamstyń arasyndaǵy 26 qańtar kúngi jekpe-jek bolmaq. Ótken jyly dál osy Úlken shlem týrnıriniń fınalynda baq synaǵan ekeýi osy joly shırek fınalda kezdesip otyr. Álemniń birinshi raketkasy, amerıkalyq Serena men Reseıdiń namysyn abyroıly qorǵap júrgen Marııanyń arasyndaǵy jeke esep 18-2 eken. Marııa sońǵy 10 jyldan astam ýaqyt boıy Serenany jeńe almaı álek. Sondyqtan da Marııa Sharapova amerıkalyq tennısshiden basym túsip, óziniń sporttyq jolyndaǵy óte mańyzdy jáne tarıhı jeńisine qol jetkizýi ábden múmkin.
Melbýrn qalasynyń naǵyz merekelik keshteri erler arasyndaǵy oıyndarmen qyza túsýde. Sebebi, erteń Federer Berdyhpen, al Djokovıch Nıshıkorımen jartylaı fınalǵa shyǵý úshin talaspaq. Árıne, favorıtter qashanda keremet tájirıbesimen jáne kópjyldyq sheberlikterimen bir bas joǵary desek bolady. Alaıda, Chehııanyń úzdik tennısshisi Tomash Berdyh pen Azııa qurlyǵynyń úzdigi, japonııalyq Keı Nıshıkorı ózderiniń qarsylastarynan ońaı jeńile salmaıtynyn erterekte dáleldep ketken.
Ásirese, álemniń birinshi raketkasy, serbııalyq Novak Djokovıch pen Keı Nıshıkorı arasyndaǵy oıyn tartysty bolýy múmkin. Sarapshylardyń aıtýy boıynsha, «japon samýraıy» atanyp ketken Keı Novakpen terezesi teń deńgeıde qarsylasýyna kúshi jetedi. Sonymen qatar, japonnyń oıyn úlgisi de Djokovıchtiń tehnıkasyna uqsaıtyny Nıshıkorıge yńǵaıly eken.
Tennısshiler arasyndaǵy erler týryna 1998 jyly aıaq basqan ataqty «maestro» Rodjer Federer óziniń áli de babynda ekendigin baıqatty. Kezinde Agassı, Safın, Sampras sııaqty myqtylardyń aýyzyn ashtyryp ketken Rodjer sońǵy jyldary Djokovıch, Nadal, Marreılardyń júıkesin biraz juqartsa kerek. Osy jyly 35 jasqa tolatynyna qaramastan, ol jalpy tennıs sporty úshin baryn salyp, jankúıerlerdi tánti qylýdan bas tartar emes. Osy oraıda, Federerdiń ashyq chempıonattaǵy kezekti jeńisine qol jetkizýi múmkin degen tujyrym bar. Ol 17 ret Úlken shlem týrnırinde jeńiske jetken. Biraq shveıtsarııalyq bul rekordty 2012 jyly qoıǵan edi.
Budan bólek arǵy kúni ótetin shırek fınaldyq matchtarda Endı Marreı Davıd Ferrermen kezdesse, 2014 jylǵy Avstralııa chempıony Stanıslas Vavrınkany jerge qaratyp ketken kanadalyq talant Mılosh Raonıch Gael Monfılspen básekege túspek.
Birneshe tennıs alańynda ótip jatqan tartysty kezdesýlerdi Qazaqstan kórermenderi «Eýrosport» telearnasy arqyly kóre alady.
