Avıatsııalyq qaýipsizdik: Qazaqstan álemdegi úzdik 20 eldiń qataryna endi
ASTANA. KAZINFORM — Eldegi áýejaı qaýipsizdigi 95,7% boldy. Bul týraly búgin Úkimet otyrysynda Kólik mınıstri Nurlan Saýranbaev málim etti.
— Qazaqstan IKAO talaptaryna joǵary deńgeıde sáıkes keledi. Áýejaı qaýipsizdigi 95,7%, áýe kompanııalarynyń qaýipsizdik deńgeıi 82%. Osy nátıjelerdiń arqasynda elimiz avıatsııalyq qaýipsizdik boıynsha álemdegi eń úzdik 20 memlekettiń qataryna kirdi. Qaýipsizdikti odan ári arttyrý maqsatynda Áýe apattaryn tergeý ortalyǵy quryldy, — dedi Nurlan Saýranbaev.
Onyń sózine qaraǵanda, avıatsııalyq ákimshilikke halyqaralyq deńgeıdegi sarapshylar tartyldy.
— IKAO-men birlesip 2050 jylǵa deıingi tıisti jospar ázirlenip jatyr, ony osy jyldyń sońyna deıin qabyldaımyz, — dedi mınıstr.
Budan buryn habarlanǵandaı, Premer-mınıstr Oljas Bektenov Qazaqstannan tikeleı júretin halyqaralyq reısterdi kóbeıtýdi tapsyrdy.
