Avıatsııa, tsıfrlandyrý, aýyl sharýashylyǵy: Qazaqstan men Vetnam qaı salalarda yntymaqtasady
ASTANA. KAZINFORM — QR Premer-Mınıstriniń orynbasary Ermek Kósherbaev Qazaqstan men Vetnam yntymqtastyǵynyń úsh perspektıvalyq baǵytyn aıtty.
− Birinshi baǵyt — avıatsııa salasy. Búginde álemdik júk áýetasymaly naryǵynyń kólemi 140 mıllıard AQSh dollaryna baǵalanady. Bul óte aýqymdy sala jáne Qazaqstan halyqaralyq áýehabty damytýǵa daıyn. Biz «Qazaq Air» avıakompanııasyn satyp alý mámilesin aıaqtap jatqan Sovico Group kompanııasymen yntymaqtastyqqa erekshe mán beremiz. Bul ushaqtar parkin ulǵaıtýǵa jáne zamanaýı logıstıkalyq habtar salýǵa múmkindik beredi, − dedi E. Kósherbaev elordada ótken Qazaqstan-Vetnam iskerlik dóńgelek ústelinde.
Onyń aıtýynsha, ekinshi mańyzdy baǵyt — aýyl sharýashylyǵy bolyp otyr. Qazaqstan egin jáne jaıylymdyq jer kólemi boıynsha álemde altynshy orynda tur.
− Biz bıdaı eksporttaýshy alǵashqy 10 eldiń qataryna kiremiz jáne un eksporty boıynsha álemdik kóshbasshylardyń birimiz. Aldaǵy úsh jylda agroónerkásip keshenindegi óńdelgen ónim úlesin 70%-ǵa jetkizýdi josparlap otyrmyz. Jalpy qýaty jylyna 220 myń tonnadan astam et óndiretin 29 qus fabrıkasy, sondaı-aq jylyna 850 mıllıon jumyrtqa óndiretin 11 jumyrtqa fabrıkasy iske qosylady. Biz vetnamdyq seriktesterdi birlesken óndirister qurýǵa jáne zamanaýı, sý únemdeıtin tehnologııalardy engizýge shaqyramyz, − dedi Premer-Mınıstr orynbsary.
Úkimet ókili aıtqan úshinshi baǵyt — tsıfrlandyrý jáne ınnovatsııalar. Qazaqstan elektrondy úkimettiń jahandyq ındeksi boıynsha 24-orynda jáne onlaın qyzmetter sapasy jóninen alǵashqy ondyqqa kiredi.
− Bıylǵy alǵashqy jartyjyldyqta eGov arqyly 20 mıllıonnan astam onlaın-qyzmet kórsetildi, bul halyqtyń 90%-ynyń tsıfrlyq sheshimderge qol jetkizgenin bildiredi. Bizdiń jetekshi tehnopark Astana Hub 1500-den astam startapty qoldaıdy, onyń ishinde Google men Microsoft kompanııalary qatysatyn jobalar da bar. Bıyl biz Alem.AI atty Ulttyq jasandy ıntellekt ortalyǵyn iske qosamyz, ol tehnologııalyq damýdyń flagmanyna aınalady. IT salasyndaǵy kóshbasshy retinde Vetnam biz úshin tsıfrlyq memlekettik qyzmetterdi damytý, tehnologııalarmen almasý jáne memlekettik protsesterge JI engizý baǵyttarynda strategııalyq seriktes bola alady, − dedi Ermek Kósherbev.
Aıta keteıik, Qazaqstan men Vetnam arasyndaǵy taýar aınalymy 860 mıllıon dollarǵa jetti.
Buǵan deıin vetnamdyq ınvestordyń Qazaq Air áýe kompanııasynyń ataýyn ózgertkeni habarlanǵan edi. Endi Qazaq Air VietJet Kazakhstan atýymen jumys istemek.
Memleket basshysy Qasym-Jomart Toqaev Aqordada Qazaqstanǵa memlekettik saparmen kelgen Vetnam Kommýnıstik partııasy Ortalyq Komıtetiniń Bas hatshysy To Lamdy qarsy aldy.