Avıatsııa salasynyń Oskary: FlyArystan tórtinshi jyl qatarynan jeńimpaz
ASTANA. KAZINFORM — Qazaqstandyq FlyArystan áýekompanııasy tórtinshi ret qatarynan Skytrax World Airline Awards syılyǵynyń «Ortalyq Azııa men TMD-daǵy úzdik loýkoster» sanatynda jeńimpaz atandy. Marapattaý rásimi 18 qyrkúıekte Ulybrıtanııanyń London qalasyndaǵy Langham qonaqúıinde ótti.
— FlyArystan áýekompanııasyn 2026 jyldyń qorytyndysy boıynsha «Ortalyq Azııa men TMD-daǵy úzdik loýkoster» sanatynda tórtinshi ret qatarynan jetken jeńisimen quttyqtaımyz. Bul — marapat áýekompanııanyń jolaýshylar arasyndaǵy bedeliniń nyǵaıyp, qyzmet kórsetý sapasynyń júıeli túrde artyp kele jatqanynyń aıqyn dáleli. FlyArystan basshylyǵy men ujymynyń bul jetistikpen maqtanýyna tolyq negiz bar, — dep atap ótti Skytrax kompanııasynyń bas dırektory Edvard Pleısted.
FlyArystan atalǵan marapatqa alǵash ret 2023 jyly ıe boldy, 2024 jáne 2025 jyldary qaıtadan óńirdegi úzdik loýkoster atandy. Tórtinshi ret qatarynan jeńiske jetý áýekompanııanyń qoljetimdi áýe tasymaly naryǵyndaǵy ornynyń turaqtylyǵyn rastap, qyzmet kórsetý sapasy men qyzmet kórsetýdegi tájirıbesiniń joǵary baǵalanǵanyn kórsetedi.
— Tórtinshi jyl qatarynan Ortalyq Azııa men TMD-daǵy úzdik loýkoster ataný — biz úshin úlken mártebe. Bul marapat ujymnyń kásibıligin, óz isine adaldyǵyn jáne jolaýshylarymyzǵa baǵdarlanǵan ustanymyn kórsetedi. Loýkoster qyzmetinde adamdardyń róli erekshe: qyzmet kórsetý sapasyn aıqyndap, bizdiń básekelestik artyqshylyǵymyzdy qalyptastyratyn — qyzmetkerler. Osy jetistikke úles qosqan árbir qyzmetkerimizdi maqtan tutamyn. Biz jolaýshylarymyzǵa qoljetimdi, jaıly ári sapaly sapar usyný úshin birlese jumys isteýdi jalǵastyramyz, — dedi «FlyArystan» AQ Prezıdenti jáne bas atqarýshy dırektory Iohan Eıdhagen.
FlyArystan-nyń halyqaralyq deńgeıde moıyndalýy operatsııalyq senimdiliktiń joǵary kórsetkishterimen de tolyqtyrylady. 2026 jyldyń jazǵy maýsymynda áýekompanııanyń reısterdi ýaqytyly oryndaý kórsetkishi 84%-dy qurady. Bul Eurocontrol derekterine sáıkes maýsym-shilde aılaryndaǵy eýropalyq áýekompanııalarynyń ortasha 70% kórsetkishinen joǵary. Mundaı dınamıka FlyArystan-nyń operatsııalyq senimdilik pen jolaýshylarǵa qyzmet kórsetý sapasyn arttyrý baǵytyndaǵy júıeli jumysyn kórsetedi.
World Airline Awards qandaı marapat
1999 jyly Skytrax táýelsiz zertteý agenttigi qurǵan World Airline Awards marapaty álemdik avıatsııada jolaýshylardyń qanaǵattanýshylyǵynyń eń bedeldi kórsetkishteriniń biri sanalady jáne jıi «Avıatsııa salasynyń Oskary» dep atalady. World Airline Awards 2026 onlaın-saýalnamasy 2025 jylǵy qyrkúıekten 2026 jyldyń mamyryna deıin ótkizildi jáne álem boıynsha 300-den astam áýekompanııasyna qyzmet kórsetý sapasyn baǵalaǵan 100-den astam elden respondentterdi qamtydy. Skytrax áýekompanııalarynan eshqandaı tirkeý alymdaryn nemese marapattardy paıdalanǵany úshin aqy almaı, zertteý jáne rásim júrgizýdi tolyq óz tarapynan qarjylandyrady.
Aıta keteıik, 1 naýryzdan bastap FlyArystan bıýdjettik áýe kompanııasynyń prezıdenti laýazymyna Iohan Eıdhagenniń taǵaıyndalǵan bolatyn.
