Avıatsııa kúni. Astana halyqaralyq áýejaıy 8 mln jolaýshyǵa qyzmet kórsetti
ASTANA. KAZINFORM — Áýejaı jumyskerleriniń tynymsyz eńbeginiń arqasynda 2024 jyly 107 tyıym salynǵan zat jáne tasymaldaýǵa shekteý qoıylǵan 27 552 zat anyqtaldy.
Astana halyqaralyq áýejaıy: tsıfrlar, faktiler, damý dınamıkasy
Avıatsııa — bul tehnologııanyń, dáldiktiń jáne adam eńbeginiń sınergetıkasy. Árbir reıs, árbir sátti oryndalǵan reıs — kózden tasa bolsa da, myńdaǵan mamannyń úılesimdi jumysynsyz múmkin bolmaıtyn nátıje. Astana halyqaralyq áýejaıy — elimizdiń áýe qozǵalysynyń júregi, munda qaýipsizdik, jaılylyq jáne tıimdilik birinshi orynda.
Avıatsııa kúni qarsańynda biz áýe qatynasyn yńǵaıly ári senimdi etetin jandar týraly, qol jetkizgen jetistikter týraly jáne jańa kókjıekterdi jaqyn etetin áýejaıdyń damýy jaıly aıtqymyz keledi.
2000 maman: táýlik boıy jumys isteıtin komanda
Astana halyqaralyq áýejaıy — jolaýshylardyń áýedegi qaýipsizdigin qamtamasyz etýdi maqsat tutqan 2000-nan astam jumyskeri bar ujym. Avıatsııalyq qaýipsizdik qyzmeti táýlik boıy áýejaıdaǵy jaǵdaıdy qadaǵalap, árbir júkti muqııat tekserip, áýe kemesine kirý múmkindigin qaýipsiz etedi, kınologtar yqtımal qaýipterdiń aldyn alady. Jer ústi qyzmetteri áýe kemelerin ushýǵa daıyndap, muzǵa qarsy óńdeýdi júrgizedi jáne áýe kemesiniń aýadaǵy turaqtylyǵyna áser etetin bagaj balansyn baqylaıdy. Dıspetcherler men ramp-agentter áýe kemeleriniń jerdegi naqty qozǵalysyn qamtamasyz etedi, al órt sóndirý qyzmeti tótenshe jaǵdaı kezinde dereý áreket etý úshin árdaıym daıyn.
Áýejaı jumyskerleriniń tynymsyz eńbeginiń arqasynda 2024 jyly 107 tyıym salynǵan zat jáne tasymaldaýǵa shekteý qoıylǵan 27 552 zat anyqtaldy. Kınologtar men qyzmettik ıtter qaýip-qaterdiń aldyn alatyn jáne ushý qaýipsizdigin qatań baqylaıtyn «kózge túspeıtin» naǵyz saqshylar. Elorda áýejaıynyń erekshe qajettilikteri bar jolaýshylary árqashan nazarda. Bıyl Astana áýejaıy múmkindigi shekteýli 31 019 jolaýshyǵa qyzmet kórsetip, olardyń jaıly ári kedergisiz qozǵalysy úshin eńbek etti.
Byltyr elorda áýejaıynda halyqaralyq áýe tasymaly 16 paıyzǵa ósti
Astana halyqaralyq áýejaıynda jolaýshylar aǵyny turaqty artýda. 2024 jyly elorda áýejaıynda 8 315 108 jolaýshyǵa qyzmet kórsetildi, bul ótken jylmen salystyrǵanda 11%-ǵa artyq kórsetkish. Іshki áýe qatynasy 9 paıyzǵa, halyqaralyq — 16 paıyzǵa ósti.
• Іshki áýe tasymaly — 5 668 234 jolaýshy (+9%).
• Halyqaralyq áýe tasymaly — 2 646 874 jolaýshy (+16%).
Saıahattaý yńǵaılyraq bolyp, baǵyttardyń sany keńeıe tústi.
Áýejaıda reıster jıiligin arttyrý jáne ushý geografııasyn keńeıtý boıynsha belsendi jumys júrgizilýde. Ótken jyly Eýropaǵa, Taıaý Shyǵysqa, Ońtústik-Shyǵys Azııaǵa jáne TMD elderine áýe reısteri qaıta jandandy. Álemniń iri qalalaryna, sonyń ishinde Ábý-Dabı, Seýl, Tbılısı, Praga, Sankt-Peterbýrgke, sondaı-aq Kamran, Bodrým jáne Phýket sııaqty tanymal týrıstik baǵyttarǵa ushý jıiligi ulǵaıtyldy.
2024 jyly alǵash ret Dýshanbe, Fýkýok, Phýket jáne Mılan qalalaryna reıster ashyldy.
Bul ósim Qazaqstannyń tranzıttik áleýetin damytýǵa, áýejaıdyń halyqaralyq hab retindegi ustanymyn nyǵaıtýǵa yqpal etedi.
Júk tasymaly: jańa rekordtar
Áýe logıstıkasy áýejaı qyzmetiniń mańyzdy bóligine aınalyp kele jatyr. Jyl ishinde 12 470 824 keli júk pen poshta óńdeldi, bul ótken jylmen salystyrǵanda 39 paıyzǵa artyq. Bul rette halyqaralyq júk tasymaly 78%-ǵa ósti, bul jahandyq logıstıkada áýejaı bedeliniń kóterilip kele jatqanyn kórsetedi.
Áýejaıda álemdegi eń ozyq órt sóndirý kólikteri qyzmet kórsetedi
Elorda áýejaıy ushý qaýipsizdigin barynsha qamtamasyz etýge taǵy bir qadam jasady. Astana áýejaıynda halyqaralyq standarttarǵa tolyq saı keletin ushaqtardy evakýatsııalaýǵa arnalǵan zamanaýı qural-jabdyqtar usynyldy. Atalmysh tehnıka kez kelgen ushaqpen, sonyń ishinde eń iri Airbus A350 jáne Boeing 747-8 ushaqtarymen jumys isteýge qabiletti.
Sonymen qatar, áýejaı órt sóndirý kólikteriniń álemdegi eń ozyq úlgileriniń biri — Rosenbauer Panther 6×6 elimizde birinshi bolyp Astana halyqaralyq áýejaıynda paıda boldy. Ol Avstrııadaǵy Rosenbauer International AG zaýytynda óndirilgen jáne eń joǵary qaýipsizdik talaptaryna jaýap beredi. Bul oqıǵa ornyna tez jetip, kez kelgen tótenshe jaǵdaıǵa jedel áreket ete alatyn biregeı tehnıka.
Rosenbauer Panther 6×6 kóligi nebári 30 sekýndta 80 km/saǵ jyldamdyqqa jetedi, bul tótenshe jaǵdaı aımaǵyna qysqa merzimde jetýge múmkindik beredi. Eń joǵary jyldamdyǵy 115 km/saǵ, bul ony óz klasyndaǵy eń jyldam kólikterdiń biri etedi. Órt sóndirý kóliginiń arnaıy dızaıny 50%-ǵa deıingi eńisterdi eńserip, 30 gradýsqa deıingi búıirlik eńisterge tótep bere otyryp, tipti qıyn jerlerde de senimdi qozǵalýǵa múmkindik beredi.
Órt sóndirý úshin Rosenbauer Panther 12500 lıtrlik sý ydysymen, 1500 lıtrlik kóbikti rezervýarmen jáne 250 kg untaqpen sóndirý júıesimen jabdyqtalǵan. Sorǵy mınýtyna 9 000 lıtrge deıin sý beredi, al aǵynnyń dıapazony 100 metrge jetedi. Osynyń barlyǵy órtterdi múmkindiginshe tezirek oqshaýlaýǵa jáne yqtımal zardaptardy azaıtýǵa múmkindik beredi.
Sonymen qatar, áýejaıdyń apattyq-qutqarý qyzmetiniń jumyskerleri áýe kemelerindegi órtterdi sóndirýdiń túrli stsenarıılerin jattyqtyra otyryp, arnaıy daıyndyqtan ótti. Mundaı tehnologııany engizý áýejaıǵa ushý qaýipsizdigin tolyq qamtamasyz etedi.
Astana halyqaralyq áýejaıynyń bolashaǵy qandaı
2025 jyldyń qańtarynda Astana qalasynyń ákimdigi men «Terminals Astana Airport Management» JShS arasynda jańa senimgerlik basqarý sharty jasaldy. Qazirgi ýaqytta ınvestor men qazaqstandyq tarap arasynda uzaq merzimdi ınvestıtsııalyq kelisim jasaý jumystary júrgizilýde. Óz kezeginde ınvestor jolaýshylar aǵynynyń ósýin eskere otyryp, qoldanystaǵy ushý-qoný jolaǵyn qaıta qurýdy, ekinshi ushý-qoný jolaǵyn salýdy, termınaldardy keńeıtýdi jáne jańa termınal salýdy josparlap otyr. Sondaı-aq ınvestor áýejaıdyń qazirgi ınfraqurylymymen jumys istep, avıakompanııalardy kóbirek tarttyryp, marshrýttar jelisin keńeıtedi, sondaı-aq jolaýshylar aǵynyn arttyrý boıynsha jumystar júrgizedi.
Esterińizge sala keteıik, 1 aqpan — Azamattyq avıatsııa qyzmetkerleri kúni.
Eske salsaq, buǵan deıin Qazaqstannyń azamattyq avıatsııasynda 25 myńnan astam adam jumys isteıtinin jazǵan edik.