Avıatehnıka kómektese almaıdy - TJK bastyǵy Almaty mańyndaǵy órtengen qoqys jaıly
NUR-SULTAN. QazAqparat - QR ІІM Tótenshe jaǵdaılar komıtetiniń tóraǵasy Vladımır Bekker Almaty mańyndaǵy qoqys polıgonyndaǵy órttiń yqtımal sebepterin atady, dep habarlaıdy QazAqparat tilshisi.
«Qoqys polıgonyna órt sóndirýshi áýe tehnıkasyn jumyldyrýdyń eshqandaı paıdasy joq. Avıatehnıka bul jerde kómektese almaıdy. Turmystyq qatty zattar polıgonynyń ishinde ártúrli qoqys túrleri bar. Qurylys materıaldary da, tamaq qaldyqtary da kóp. Sol sebepti, ol jerde týyndaǵan órtti sýmen ǵana sóndirý áreketi jaǵdaıdy ýshyqtyryp jiberýi múmkin. Eń durys amal - sol qoqystyń janyp jatqan bóligin syrtqa shyǵaryp, sóndirý. Bolmasa, ol jerdi topyraqpen kómip, ınjenerlik tehnıkamen nyǵyzdap battap tastaǵan abzal. Órtti solaı sóndirýge bolady», - dedi QR ІІM Tótenshe jaǵdaılar komıtetiniń tóraǵasy Vladımır Bekker TJK-da ótken baspasóz máslıhatynda.
Onyń aıtýynsha, órttiń naqty qaıdan shyqqany belgisiz.
«Sebep ártúrli bolýy múmkin. Polıgonda jumys isteıtinder nemese úı-jaıy joq adamdar abaısyzdyq tanytýy múmkin. Ózderińiz biletindeı, úı-jaıy joq adamdar ondaı jerde jıi júredi. Stepnogor qalasynda qaıtalanǵan jaǵdaı sekildi ol jerge tutanǵan qoqys ákelinip, tógilýi yqtımal. Dese de, qazirgi ýaqytta órttiń shyǵý sebebi anyqtalǵan joq. Bastysy, tilsiz jaýdy órshitpeı tezirek óshirsek dep otyrmyz», - deıdi Vladımır Bekker.
Eske sala ketsek, búgin Almaty turǵyndary tańnan beri qala aspanyn ys pen tútin torlaǵanyn aıtyp, shaǵymdanǵan edi. Áleýmettik jeli qoldanýshylarynyń boljaýynsha, tútin Almaty oblysyndaǵy qoqys polıgonynan kelgen. Tótenshe jaǵdaılar komıteti bul aqparatty rastady.
«16 mamyr kúngi túngi saǵat 2:30-da órtke qarsy qyzmetke Qarasaı aýdanyna qarasty Áıteı aýylynan 7 shaqyrym jerde qoqys polıgony janyp jatqany týraly habar túsken. Qatty turmys qaldyqtardan tutanǵan órttiń aýmaǵy bir gektardy qamtydy degen boljam bar. Qurban bolǵan nemese zardap shekkender joq» - delingen komıtettiń málimetinde.
Dese de, Almaty qalasynyń tótenshe jaǵdaılar departamenti qoqys polıgonyndaǵy órt saldarynan shahardyń aýasy shekten tys lastanǵany týraly aqparattyń shyndyqqa janaspaıtynyn málimdedi.
