Avıaotyn óndirisiniń kólemi 1,8 ese ulǵaıdy- Qanat Bozymbaev

NUR-SULTAN. QazAqparat – Energetıka mınıstri Qanat Bozymbaev Qazaqstandaǵy avıaotyn óndirisiniń kólemi ishki naryqty tolyq qanaǵattandyratyndyǵy týraly aıtty, dep habarlaıdy QazAqparat tilshisi.

«Qazaqstandyq munaı óńdeý zaýyttaryn jańǵyrtýdyń arqasynda avıaotyn óndirisiniń kólemi 2018 jylmen salystyrǵanda, 694 myń tonnaǵa deıin nemese 1,8 ese ulǵaıdy. Otandyq MÓZ-derdiń arqasynda avıaotyn óndirisiniń kólemi ishki naryqtyń qajettilikterin tolyq qanaǵattandyrýǵa múmkindik beredi. Qajet bolǵan jaǵdaıda óndirý kólemin 850 myń tonnaǵa deıin arttyrýǵa bolady. Osyǵan baılanysty avıaotyn naryǵynda jaǵdaı turaqty ári tapshylyq joq», - dedi Energetıka mınısti Úkimet otyrysynda.

Sonymen qatar, Qanat Bozymbaev avıaotynnyń baǵasyna qatysty pikir bildirdi

«2019 jyldyń 25 qyrkúıegindegi Kaspıı naryǵy derekteri boıynsha, Qazaqstan MÓZ-derinde avıakerosınge kóterme baǵa tonnasyna 578-621 dollardy quraıdy. Bul rette ımporttyq avıaotynǵa baǵa tonnasyna 672-700 dollarǵa deıin jetedi. 2018 jyldyń jeltoqsanynan bastap avıaotynǵa kóterme saýda baǵasynyń tómendeýi tonnasyna 65 dollaryn quraǵan edi. Osylaısha, avıaotynnyń baǵasy suranys pen usynys negizinde naryqpen retteledi. Qazaqstannyń ishki naryǵynda baǵa Reseıde óndiriletin kerosın baǵasymen shamalas. Osy rette Reseı avıaotynyna baǵalar deńgeıi Qazaqstanda óndiriletin kerosınniń saýda baǵalaryn ósirýde tejeýshi faktor bolyp otyrǵanyn atap ótemiz», - dedi mınıstr.

Eske sala ketsek, búgingi Úkimet otyrysynda Premer-mınıstr Asqar Mamın Ulttyq ekonomıka, Energetıka men Indýstrııa jáne ınfraqurylymdyq damý mınıstrlikterine áýe kerosınge baǵa belgileýdi, tıisti zańnamalyq retteýmen máseleni pysyqtaýdy tapsyrǵan bolatyn.