Avıaotyn tapshylyǵyn sheshý: biryńǵaı operator qurylady
ASTANA. KAZINFORM – Qazaqstannyń áýe keńistigi arqyly tasymaldanatyn júk kólemi artady. Bul týraly Parlament Májilisinde kólik-logıstıkalyq áleýetti damytý taqyrybyna arnalǵan Úkimet saǵatynda Kólik mınıstri Marat Qarabaev málim etti.
- 2023 jyldyń qorytyndysy boıynsha otandyq áýejaılarda 150 myń tonna júk óńdeldi. Memleket basshysynyń tapsyrmasy aıasynda 2028 jylǵa deıin elimizdiń áýejaılarynda óńdelgen júk kólemin 2 esege ulǵaıtý boıynsha jumystar pysyqtalyp jatyr.
Bul kórsetkishti 2030 jylǵa qaraı 500 myń tonnaǵa jetkizý josparlanǵan. «Azııa – Eýropa» baǵyty boıynsha júk tasymalynyń kólemi 12 mln tonna bolsa, onyń ishinde 1,7 mln tonnasy Qazaqstannyń áýe keńistigi arqyly tasymaldanady. Bizdiń maqsat – osy kólemniń bir bóligin el aýmaǵynda ıgerý, - dedi M. Qarabaev.
Onyń aıtýynsha, atalǵan bastamany júzege asyrý úshin áýejaı ınfraqurylymyn jańǵyrtý qajet. Osy baǵytta áýejaılarda jolaýshylar men júk termınaldaryn, otyn quıý keshenin jáne ushý-qoný jolaǵyn modernızatsııalaý, tehnıkalardy jańartý ári ushaqtarǵa tehnıkalyq qyzmet kórsetý jáne jóndeý ortalyǵyn qurý boıynsha jumystar josparlanǵan.
- Bul rette negizgi suraqtardyń biri - áýejaılardy avıaotynmen qamtamasyz etý máselesi. Qazir áýejaılar kórshi elderden janarmaı satyp alýǵa májbúr (otandyq avıakompanııalar qazaqstandyq avıaotynmen toltyrylady). Avıaotyn tapshylyǵyn sheshý úshin Biryńǵaı operator («QazMunaıGaz-Aero» JShS bazasynda) aıqyndaýdy usynamyz. Ol tıimdi emes deldaldardy joıýǵa, jetkizilimderdi turaqtandyrýǵa jáne avıaotynnyń úlken kólemderin satyp alý arqyly tranzıttik ushaqtarǵa Qazaqstan aýmaǵy arqyly ushý úshin qoljetimdi baǵalardy usynýǵa múmkindik beredi. Sonymen qatar, júk rásimderin ońtaılandyrý, protsesterdi tsıfrlandyrý jáne arnaıy ekonomıkalyq aımaqtar rejımin engizý boıynsha jumystar atqarylyp jatyr, - dedi vedomstvo basshysy.
Budan buryn habarlanǵandaı, M. Qarabaev temirjol salasynda iske asyrylyp jatqan iri jobalarǵa túsinik berdi.