«Avıadarts-2015»: Ekinshi oryn ıelengen qazaqstandyq ushqyshtardy Aqtóbede saltanatpen kútip aldy - QR QM (FOTO)
Búgin «Dýbrovıchı» reseılik polıgonynan tikeleı ushqyshtarymyz Aqtóbege keldi, onda olardy eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteri Áskerı ınstıtýtynyń kýrsanttary saltanatty túrde kútip aldy. Bul týraly QR Qorǵanys mınıstrliginiń baspasóz qyzmeti habarlady.
Ushqysh bolýdy jáne ÁÁK iri halyqaralyq saıystarynda óner kórsetýdi armandap júrgen qazirgi kýrsanttar úshin bul kezdesýdiń orny bólek. Sebebi, «Avıadartstan» kelgen ushý ekıpajdarynyń quramynda Áýe qorǵanysy kúshteri Áskerı ınstıtýtynyń túlekteri kapıtan Nurbek Ábdishúkir, Aıdar Gaýharov, Manas Dáýletbaev pen Alekseı Keıl. Esterińizge sala keteıik, 1 tamyzda birinshi halyqaralyq armııa oıyndary sheńberinde Rıazan oblysynyń «Dýbrovıchı» polıgonynda «Avıadarts» baıqaýy bastaý aldy. Munda Qazaqstan, Reseı, Belarýs jáne Qytaı Áskerı-áýe kúshteriniń ushý ekıpajdary ushýdy basqarý jáne avıatsııalyq tehnıkany jaýyngerlik qoldaný sheberliginde saıysqa tústi. Baıqaýǵa Qazaqstannan tórt ushý ekıpajy jáne 12 ushý apparaty qatysty.
Bizdiń ushqyshtarymyz úshin «Avıadartsqa» báselelesý alǵashqy tájirıbe bolyp tabylady. Alaıda, bul olarǵa baıqaýdyń barlyq synaǵynan múdirmeı ótýge jáne ushý daǵdysynda reseılik ushqyshtardan ǵana qalys qalyp, Qytaı men Belarýs ÁÁK úzdik ókilderin ozyp ketýge kedergi bolǵan joq.