Avıatsııa qaýipsizdigi boıynsha jaýapty tulǵalar da jazalanatyn bolady - A. Raý
ASTANA. QazAqparat - Avıatsııa qaýipsizdigi boıynsha jaýapty tulǵalar da jaýapqa tartylatyn bolady. Bul týraly búgin Májiliste Investıtsııalar jáne damý vıtse-mınıstri Albert Raý osylaı málim etti. Onda «Qazaqstan Respýblıkasynyń keıbir zańnamalyq aktilerine áýe keńistigin paıdalaný jáne avıatsııa qyzmeti máseleleri boıynsha ózgerister men tolyqtyrýlar engizý týraly» zań jobasynyń tanystyrylymy ótken bolatyn.
Vıtse-mınıstrdiń aıtýynsha, zań jobasymen avıatsııa personalynyń medıtsınalyq kýálandyrý erekshelikterine mán berilip otyr. «Budan bólek, avıapersonaldyń jumysqa jaramdylyǵy týraly kúmándi qorytyndy bergeni medıtsınalyq sarapshylarǵa ákimshilik jaýapkershiligi qarastyrylady. Atap aıtqanda, ondaı senimsiz qorytyndylar úshin 100 aılyq eseptik kórsetkish, al qaıtalanǵan jaǵdaıda 200 aılyq eseptik kórsetkish aıyppul salynady», - dedi A. Raý. Onyń sózine qaraǵanda, avıatsııa qaýipsizdigin qamtamasyz etýge qatysty jaýapty tulǵalarǵa qatysty da ákimshilik jaýapkershilik kózdelgen. Qoldanystaǵy zań boıynsha tek uıymǵa qatysty jaýapkershilik qarastyrylsa, endi buǵan jaýapty tulǵalar da enip otyr.
Jalpy zań jobasyndaǵy basty jańalyqtardyń biri - ushýlardaǵy medıtsınalyq qyzmetterdiń qamtylýy bolyp tabylady. «Avıaapattarǵa qatysty ushqyshtardyń densaýlyǵyna mán berý meılinshe qatańdatylady. Bundaı problemalar kóptegen jerlerde oryn alǵan. Osyǵan baılanysty ushqyshtardyń, avıapersonaldyń medıtsınalyq kýálandyrýlaryn baqylaý qataıtylady. Ókinishke qaraı, bizde de bundaı problemalar bar bolyp otyr. Máselen, bizdiń tekserýlerimiz boıynsha, byltyrǵy jyly avıapersonaldarǵa kúmándi, biliksiz medıtsınalyq qorytyndylar berilgen 80-nen astam oqıǵa tirkeldi. Sondyqtan da, osy máselege baqylaýdy kúsheıtý normalary qarastyrylady», - dedi Raý.
