«Avatar» fılminiń jalǵasyn kórermender qazaq tilinde tamashalaı alady
ALMATY. KAZINFORM — Disney kompanııasynyń qarjylandyrýymen kezekti fılm qazaq tiline dýblıajdaldy.
Almatyda «Avatar: Ot pen kúl» fılminiń tusaýkeseri ótti. Álemge tanymal rejısser Djeıms Kemeronnyń týyndysy elimizdiń kınoteatrlarynda qazaq jáne orys tilderinde kórsetiletin bolady. Aıta ketken jón, bul qazaqsha dybystalǵan áıgili rejısserdiń alǵashqy fılmi emes. 2022 jyly «Avatar: Sý joly» kınosy da kórermenderge qazaq tilinde jol tartqan edi.
Dýblıaj rejısseri Shah-Murat Ordabaev buǵan deıin qazaq tilinde dybystalǵan fılmderge álemdik kompanııa joǵary baǵa bergenin atap ótti.
— Disney bizdi án aıtýǵa myqty, óleń jazýǵa myqty mýzykalyq halyq retinde tanıdy. Buǵan deıin jobalarymyz arqyly ózimizdi osy jaǵynan jaqsy kórsetkenbiz. Endi «Avatar» sekildi fılm arqyly bizdiń dýblıaj dramada da myqty ekenin tanytpaqpyz. Al kelesi jylǵa kelsek, «Ańdar shahary 2» kassalyq tabysy jaqsy boldy. Sol sekildi «Avatardyń» dýblıajy jaqsy kassa jınasa, 2026 jyly 5-9 fılmdi dybystaýǵa tapsyrys berýi múmkin, — dedi ol.
Jalpy 2025 jyly Disney stýdııasy «Elıo», «Lılo men Stıch» jáne «Ańdar shahary 2» fılmderin qazaq tiline dýblıajdady. Al ótken jyly álemdik kınokompanııa «Oıjumbaq 2», «Moana 2», «Mýfasa. Arystan patsha» atty úsh fılmin qazaq tiline aýdarýǵa tapsyrys berip, dýblıaj jumystaryn qarjylandyrdy.