«Aýzyńdy jap, seni de óltiremiz»: Sherzattyń anasy oqıǵanyń mán-jaıyn aıtty
TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.
Sot otyrysy barysynda Sherzattyń anasy Gúlbara Beıshembıeva jábirlenýshi retinde qaıǵyly oqıǵanyn qalaı bolǵanyn eske aldy.
Onyń aıtýynsha, kúıeýinen kelip túsken qońyraýdan keıin Nurqanat Ǵaıypbaev kólikke minip, «Qamajaı» dúkenine attanǵan. Odan keıin jábirlenýshiniń ózi enesimen birge taksıge minip, sol jaqqa barǵan.
— Dúken aldynda 10-15 shaqty adamdy kórdim. Olardyń arasynda qyzdardy da kórdim. Kele salǵanda bireý «delaıte» dedi. Sosyn bular jabylyp ketedi. Ájesi júgirip baryp, «balalarym qoıyńdar» dep jatqanda Abzal qolynan julqyp jiberdi. Sosyn men Sherzatqa júgirgende Abzal men Nurbol qolymnan ustap aldy. Men olarǵa «balama tımeńdershi, anasymyn» dep ótinemin. Sol kezde Abzal maǵan «aýzyńdy jap, seni de óltiremiz» dedi, — dep eske aldy ol.
Gúlbara Beıshembıeva sózinshe, osy sátte ol dúken jaqta turǵan qyzdardan jedel járdem, polıtsııa shaqyrýdy ótingen. Alaıda olar eshqalaı is-áreket etpegen. Sondaı-aq osy sátte jasóspirimniń anasy Qarjaýbaı Nurymovty sottalýshylardyń biri bótelkemen urǵanyn kórgen.
— Sol kezde 7-8 adam Nurqanat pen Sherzatqa jabylyp jatady. Sosyn Sherzat artqa sheginip, qulaıdy. Sonda balamnyń aýzynan burq etip qan aqqanyn kórip, oǵan júgirip baramyn. Ol «mama myna jaǵymdy qarańyzshy» deıdi. Sol kezde pyshaq salǵanyn kórdim. Olar Nurqanatty uryp jatqanda Nurqııastyń qolynda myltyq boldy. Nurqanatty uryp bolǵannan keıin balamnyń aýyr halde jatqanyna qaramastan bizge qaraı bet aldy. Sosyn Nurqııas Sherzattyń basynan urmaqshy bolǵanda oń qolymmen tosyp, ol qolyma tıedi. Sherzatty jelke tusynan 3-4 ret urady. Artymda Nurqııas «tynysh tur, seni de óltirem» dep myltyqpen qorqytady. Sonda úıden adamdar shyǵyp qalady da, bular qashady, — dedi Gúlbara Beıshembıeva.
Eske salaıyq, buǵan deıin sotta Sherzat óliminiń negizgi sebebi ataldy.
Sondaı-aq Nurqanat Ǵaıypbaevtyń janjal barysynda qandaı jaraqat alǵany aıtyldy.
Prokýror oqıǵanyń tolyq hronologııasyn baıandady.
Aıyptalýshylardyń kópshiligi kináni moıyndaǵan joq.
Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy.
Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.