Aýyzsýsyz, jylýsyz qalǵan BQO aýylynda tótenshe jaǵdaı jarııalandy

ASTANA. QazAqparat – Batys Qazaqstan oblysy, Terekti aýdanynyń Terekti aýyldyq okrýginde tehnogendik sıpattaǵy tótenshe jaǵdaı jarııalandy. Bul týraly eldi meken ákimdiginiń «Ashyq» NQA portalyna ornalastyrǵan sheshim-jobasynda jazylǵan, dep habarlaıdy QazAqparat tilshisi.

«30 qańtarda Qabyl tóbe aýylyndaǵy qudyqtardan sý aıdaý toqtatyldy. Sebebi, Terekti aýylyna aýyz sý beretin 5 sý sorǵyshtyń bireýi isten shyqty. Qalǵan sý sorǵyshtar qajetti qysymdy bere almaıtyndyqtan, qazirgi ýaqytta 1 859 turǵyn úı, 51 áleýmettik nysan ortalyqtandyrǵan aýyz sýsyz otyr. Sebebi qalǵan 4 sý sorǵyshtyń tozýy 43 paıyzdy quraıdy.

Onymen qosa, memlekettik baǵdarlamamen salynǵan 27 turǵyn úı (26-sy – bir páterli jeke úı, bireýi – 36 páterli úsh qabatty úı) jylýsyz qaldy.

Sebebi bul úılerde jylytý júıesi ortalyqtandyrylǵan sý júıesimen biriktirilgen. Sý qysymy tómendegen kezde gaz qazandyǵy jylytý júıesiniń jumysyn avtomatty túrde toqtatqan (tótenshe jaǵdaıdyń aldyna lý úshin). Bul úılerdiń sýyp ketýine alyp keldi. Qazirgi ýaqytta atalǵan úı turǵyndary ózge jerlerge kóship jatyr», - delingen qujatta.

Sheshimge qosymsha berilgen túsindirmede jazylǵandaı, atalǵan jaǵdaıdy retteý úshin eldi mekende tehnogendik sıpattaǵy tótenshe jaǵdaı engizilmek. Qujatta Terekti aýylynyń ákimi A.Áýbákirov jóndeý jumystary men jańa sorǵylardy satyp alý úshin aýdan ákimdiginen qosymsha qarajat bólý qajettigin kórsetken.

Sheshim-jobasy portalǵa 8 aqpanda ornalastyrylyp, 9 aqpanǵa deıin talqylaýda boldy jáne alǵash jarııalanǵan kúninen bastap kúshine endi.