Aýyzsý jáne ystyq sý problemasy týyndaǵan Aqtaýda sheneýnikter sógis aldy
Aqtaýda ortalyqtan keletin aýyzsý qysymy tómendetilgenin buǵan deıin jazǵan bolatynbyz. Keıin qalaǵa ystyq sý berý toqtatyldy. Qala ákimi Erbol Іzbergenov onyń sebebi retinde MAEK elektr stantsııasy qondyrǵylarynyń eskirýine baılanysty jasalyp jatqan jóndeý jumystaryn atady.
Keshe Mańǵystaý oblysynyń ákimi Nurlan Noǵaev qalany jylý jáne aýyzsýmen qamtamasyz etý máselelerine arnalǵan keńes ótkizdi.
Óńir basshysy tushytý qondyrǵysyn jóndeýge baılanysty aýyzsý qysymy tómendegen «MAEK-Qazatomónerkásip» kásipornyndaǵy jaǵdaıdy turaqtandyrý boıynsha shuǵyl sharalar qabyldaýdy tapsyrdy.
«Jaǵdaıǵa naqty taldaý jasalýy kerek, sondyqtan jaýapty tulǵalarǵa MAEK kásipornynyń jumysyn kúndelikti baqylaýǵa alýdy tapsyramyn.
Ystyq sý berýdi toqtatýdyń sebebi naqty nede ekenin turǵyndar bilýi kerek. Turǵyndar artyq suraq qoıyp, mazany almasa eken dep, «ystyq sýdy búgin beremiz nemese erteń tańerteń beremiz» dep bos ýáde berýdiń qajeti joq. Kez kelgen máselege atústi qaramaı keshendi ári jan-jaqty qarastyrǵan durys. Bul jaǵdaı kommýnaldyq qyzmetter men ýákiletti organdardyń jumysyndaǵy úılestirýdiń nasharlyǵynan oryn alyp otyr», - dedi Nurlan Noǵaev.
Aımaq basshysy oblys ákiminiń birinshi orynbasary Bekbol Orynbasarovqa, qala ákimi Erbol Іzbergenovke, Energetıka jáne turǵyn úı-kommýnaldyq sharýashylyǵy basqarmasynyń basshysy Berdibek Qartbaevqa, «MAEK» JShS bas dırektory Talǵat Esentúgelovke jáne onyń orynbasary Murat Iǵalıevke sógis jarııalady.
Málim etilgendeı, 30 qarasha kúni Aqtaýda ystyq sýdy tutyný artqan, onymen qosa ahýalǵa aıazdy kún raıy keri áserin tıgizgen. Osyǵan baılanysty rezervýarlardaǵy sý deńgeıi kúrt tómendegen.
«Kásiporyn basshylyǵy rezervýarlardaǵy sý deńgeıin tómendetý týraly sheshim qabyldady. Osyǵan baılanysty Aqtaýǵa ystyq sý berý shekteldi.
Qalany jylýmen irkilissiz qamtamasyz etý úshin ystyq sý berýdi ýaqytsha shekteý sheshimi qabyldandy. Qazirgi ýaqytta máseleni sheshýge barlyq kúshter jumyldyryldy», - delingen ákimdik málimetinde.
