Aýyzsý baǵasynyń qymbatshylyǵy Munaıly aýdany turǵyndaryna qıyndyq keltirip otyr
ASTANA. Jeltoqsannyń 24-i. QazAqparat - QR Parlamenti Májilisiniń depýtaty Zeınolla Alshymbaev Aýyl sharýashylyǵy mınıstri Aqylbek Kúrishbaevqa saýal joldap, 75 myń turǵyny bar Munaıly aýdanyna qarasty eldi mekenderdegi aýyzsý máselesi jaıly sóz qozǵady,
dep habarlaıdy QazAqparat.
Depýtat aýdan ortalyǵynda ornalasqan kóp qabatty úılerge ınjenerlik júıeleriniń tozýyna baılanysty sońǵy 5-6 jyldan beri aýyzsý avtokólik arqyly tasymaldanyp otyrǵanyn aıtty. 2007-2008 jyldary selo ishindegi sý qubyrlary tolyǵymen aýystyrylyp, qazirgi ýaqytta barlyq kóp qabatty turǵyn úılerge aýyzsý qubyr arqyly berilip otyr. Qalǵan eldi mekenderge aýyzsý arnaýly avtokóliktermen tasymaldanady.
Aldaǵy ýaqyttarda aýdan turǵyndaryn sapaly aýyzsýmen qamtamasyz etý maqsatynda jospar jasaqtalyp, qarajattyń kólemine qaraı jumystar júrgizilýde. Qazirgi ýaqytta turǵyndarǵa qıyndyq keltirip otyrǵan máselelerdiń biri - aýyzsý baǵasynyń qymbattyǵy. Turǵyndarǵa qubyrmen jiberiletin 1 tekshe metr aýyzsýdyń baǵasy 179 teńge 13 tıyn, al avtokólikpen tasymaldanatyn sýdyń baǵasy 476 teńge 19 tıyndy qurap otyr.
Qazaqstan Úkimetiniń 2006 jylǵy sáýirdiń 5-indegi qaýlysymen bekitilgen Aýyzsýmen jabdyqtaýdyń balamasyz kózderi bolyp tabylatyn asa mańyzdy toptyq sýmen jabdyqtaý júıelerinen aýyzsý berý jónindegi qyzmetterdiń qunyn sýbsıdııalaý erejesine Úkimettiń sheshimimen 2009 jylǵy naýryzdyń 30-ynda oqshaý sýmen jabdyqtaý júıelerin sýbsıdııalaý jónindegi tolyqtyrýlar engizilgen bolatyn.
Osyǵan oraı depýtat Zeınolla Alshymbaev Aýyl sharýashylyǵy mınıstri Aqylbek Kúrishbaevqa: «Aýdan turǵyndaryna jetkiziletin aýyz sýdyń baǵasyn sýbsıdııalaý maqsatynda QR Aýyl sharýashylyǵy mınıstrliginiń Sý resýrstary jónindegi komıtetine talap etilgen qujattary tapsyrylǵan bolatyn. Aýdan turǵyndarynyń 75-80 paıyzy oralmandar ekendigin eskere otyryp, aýdan turǵyndaryna aýyzsý baǵasyn tómendetý úshin atalǵan maqsatqa sýbsıdııa bóldirýge yqpal etýińizdi suraımyn»,- dedi.
