Aýyzasharǵa kelgen qonaqtardyń ishinde koronavırýs juqtyrǵan adam bolǵan - Esmaǵambetova

NUR-SULTAN. QazAqparat - Aýyzashar kezinde jappaı koronavırýs juqtyrý faktisi tirkelgen. Bul týraly QR bas memlekettik sanıtar dárigeri Aıjan Esmaǵambetova QR Densaýlyq saqtaý mınıstrliginiń medıa ortalyǵynda ótken tikeleı efırde aıtty, dep habarlaıdy QazAqparat tilshisi.

Ol koronavırýs anyqtalmaǵan aýdandarda ne sebepti karantın talaptary saqtalatynyn aıtyp ótti.

«Koronavırýs jaǵdaıy tirkelmegen óńir joq. Kún saıyn jaǵdaıǵa monıtorıng júrgizip otyramyz. Sondyqtan epıdemıologııalyq jaǵdaıǵa baılanysty barlyq óńirde karantın sharalary saqtalýy kerek. Aýlada bolsyn toı ótkizgisi keletinderdi túsinemiz, biraq ózgege aýrý juqtyryp almaý jaǵyn oılaýymyz kerek. Sondyqtan bul saqtyq sharalaryna túsinistikpen qaraýǵa shaqyramyz. Qytaı, Ońtústik Koreıa sııaqty memleketter koronavırýsty jeńdi dep oılamańyzdar, olar áli de bul dertpen kúresýde», - deıdi ol.

Onyń aıtýynsha, otbasylyq merekelerdi ótkizýge tyıym salynǵan.

«Aımaqtardyń birinde tyıym salynǵanyna qaramastan aýyzashar jasaǵan jaǵdaı kezdesti. Qonaqqa barǵandardyń ishinde koronavırýs ınfektsııasyn juqtyrǵan adam bolǵan. Sondyqtan qonaqqa barýdy, qonaq shaqyrýdy, aýyzasharǵa barýdy toqtatý kerek», - deıdi ol.