Aýyzasharǵa ımam shaqyrý zańǵa qaıshy bola ma?

ASTANA. QazAqparat - Qazaqstan Respýblıkasynda ázirlenip jatqan terrorızm men ekstremızmge qarsy kúres jónindegi zań jobasy dinı mekemelerden tys kez kelgen formada ýaǵyz júrgizýge tyıym salmaq.

«Bizdiń zertteýimiz boıynsha, jalpy, halyqtyń bilýi boıynsha, qazir jat dinı aǵymdar jastardy dinı mekemelerden tys jerde áńgimege tartyp, ýaǵyzdaryn aıtady. Meshitter tıisti talapqa saı, árıne, jat aǵymdy nasıhattamaıdy. Biraq, terrorızm men ekstremızmge qatysty ýaǵyz jeke páterler men zańsyz dinı jınalystarda kóp aıtylatyny anyq. Jańa zańǵa engizilsin dep aıtylyp otyrǵan bul normany Qazaqstan musylmandarynyń dinı basqarmasy usynyp otyr, ıaǵnı, ýaǵyz tek meshitte aıtylýy kerek. Al, ózge jerlerdiń bárinde aıtylǵan ýaǵyz zańsyz dep tanylýy kerek. Zańǵa osy norma engizilse, páterlerinde, meshitten tys kez kelgen jerde bir top adamdy jınap, ýaǵyz júrgizetinder jazalanatyn edi»,-deıdi QR Din isteri jáne azamattyq qoǵam mınıstrligi din isteri komıtetiniń tóraǵasy Ǵalym Shoıkın.

«Sonda, aýyzasharǵa ımam shaqyryp, Quran oqytý, artynsha, din týraly pikir almasý ýaǵyz aıtý bolyp sanala ma?» degen suraqqa jaýap bergen Ǵ.Shoıkın: «Qazaqtyń dástúrine sáıkes, otbasymyzdy jınap, quran oqytamyz, aýyzashar beremiz. Imam kelip Quran oqıdy, din týraly aıtady. Biraq, bul ýaǵyz deýge jatpaıtyn másele deýge bolady. Sebebi, kúnde aýyzashar berip, kúnde Quran oqytpaıtynymyz anyq. ıAǵnı, bul bir rettik sharalar. Biz tyıym salǵymyz keletin ýaǵyz - ol jat aǵymdardyń júıeli jumysy»,-dep túsindirdi.