Aýyz sý jáne turǵyn úı kommýnaldyq sharýashylyǵy baǵdarlamalary kúzde qabyldanady - Kárim Másimov
ASTANA. Shildeniń 27-si. QazAqparat /Rýslan Ǵabbasov/ - Aýyz sý jáne turǵyn úı kommýnaldyq sharýashylyǵy baǵdarlamalary kúzde qabyldanady. Bul týraly búgin Úkimette ótken baspasóz máslıhatynda Premer-Mınıstr Kárim Másimov málim etti.
«Eń basty qajettilik - sý bolǵandyqtan aýyz sý máselesin birinshi orynǵa qoıar edim. Buǵan deıin bolǵan baǵdarlamada oń jáne teris tustary boldy. Biz osy máseleni Úkimet otyrsynda tyńǵylyqty talqylap, kemshin tustardy eskerip óttik jáne baǵdarlama jobasy tanystyryldy. Qazirgi kezde ol tıisti talqylaýlardan ótip jatyr. Meniń oıymsha, Aýyz sý baǵdarlamasy Turǵyn úı kommýnaldyq sharýashylyǵy baǵdarlamasymen birlese aldaǵy jyldarǵa arnalǵan bıýdjet jobasymen birge tanystyrylatyn bolady. Sebebi, bul resýrstarsyz ony iske asyrý qıynǵa túsedi», - dedi Premer-Mınıstr.
Osy oraıda Úkimet basshysy Jol kartasy aıasyndaǵy tájirıbe eskeriletinin aıta kele, osy turǵyda, ıaǵnı aýyz sý men turǵyn úı kommýnaldyq sharýashylyǵy boıynsha jergilikti bıýdjettiń tarapynan qosymsha qarjylandyrý qajet bolatynyn jetkizdi. «Meniń paıymdaýymsha, qyrkúıek - qazan aılarynda bıýdjetpen birge osy eki baǵdarlama qabyldanatyn bolady»,-dedi K. Másimov.
