Aýyz sý baǵdarlamasynyń oıdaǵydaı oryndalmaýynda bizdiń de kinámiz bar - Bas prokýrordyń orynbasary
Bul týraly búgin Astanadaǵy «Sý resýrstaryn utymdy paıdalanýdyń, onyń ishinde turǵyndardy aýyz sýmen qamtamasyz etýdiń ózekti máseleleri» taqyrybyndaǵy semınarda QR Bas prokýrorynyń orynbasary Jaqyp Asanov málim etti.
«Bul eń ózekti máselelerdiń biri. Atap aıtqanda, óz sý qory jetispeıtin memleketterdiń qataryndamyz. Ózderińizge belgili, elimizde halyqty aýyz sýmen qamtamasyz etýge arnalǵan 2011-den 2020 jylǵa deıingi «Aq bulaq» baǵdarlamasy iske asyrylyp jatyr. Ókinishke qaraı buǵan deıingi osyndaı baǵdarlama kemshiliksiz bolǵan joq. Onyń oıdaǵydaı oryndalmaýynda bizdiń de kinámiz bar ekenin moıyndaýymyz kerek»,-dedi J. Asanov.
Osy oraıda ol «Aq bulaqqa» deıingi aýyz sý baǵdarlamasynyń oryndalýyn tekserý kezinde oblystardyń kópshiliginde bul másele sheshimin tappaǵany anyqtalǵanyn jetkizdi. «Ókiletti organdar jaǵynan qajetti baqylaý bolmaǵandyqtan, sondaı-aq prokýratýra organdary tarapynan tıisti qadaǵalaý jasalmaǵandyqtan jergilikti jerlerde sýmen qamtamasyz etý nysandaryn jobalaý men qurylysy kezinde qoldanystaǵy zańnamany óreskel buzý jaǵdaılaryna jol berildi»,-dep toqtaldy J. Asanov.
«Buǵan deıingi baǵdarlamada qarastyrylǵan 2 myń 283 nysannyń 9 paıyzǵa jýyǵy jumys istemeıdi. Bul shamamen 200 nysan jáne onyń ishinde 42-si erterek paıdalanýǵa berilgen. Jalpy 2012 jyly merdiger uıymdardyń basshylary men kináli laýazymdy tulǵalarǵa qatysty 17 qylmystyq is qozǵaldy»,-dedi Bas prokýrordyń orynbasary.
Onyń sózine qaraǵanda, sońǵy jarty ǵasyrda aýyz sýdy paıdalaný kólemi 8 esege jýyq artqan eken. Mamandardyń paıymdaýynsha, aǵymdaǵy júzjyldyqtyń orta kezinde 50 el sýdy ımporttaýǵa májbúr bolmaq. 2025 jylǵa qaraı 7 mıllıard adamnyń 3 mıllıardy sý tapshylyǵyn sezinedi.
